Qazaqstan óz elektr energııasyn Qytaı, Pákistan men Aýǵanstanǵa eksporttamaq

ASTANA. QazAqparat - Qazaqstan óz elektr energııasyn Qytaı, Pákistan jáne Aýǵanstanǵa eksporttaý múmkindigin zerttep jatyr. Bul týraly búgin Astanada energetıka máselelerine arnalǵan konferentsııada QR Energetıka mınıstri Qanat Bozymbaev málim etti, dep habarlaıdy QazAqparat.

«Qytaıdyń naryǵy aýqymdy ekenin bilesizder. Biz birneshe jyl boıy elektr energııasyn jetkizý múmkindikterin zerttedik. Árıne, bizde búginde tıisti baılanys bolmaı tur, biraq aldaǵy ýaqytta bul másele sheshiledi degen oıdamyn. Qytaıda elektr qýatyn tutyný kólemi artyp kele jatqanyn baıqaýdamyz. Sondyqtan bolashaqta energııany eksporttaý múmkindigi bar»,-dep toqtaldy Bozymbaev.

Onyń paıymynsha, Qazaqstanǵa elektr energııasyn Ortalyq Azııaǵa eksporttaý laıyqty bolady. Sonymen qatar Aýǵanstan men Pákistannyń baǵytyna qaraı energııany ótkizý júıesiniń damýy úderisine de nazar aýdarǵan jón.

«KEGOK» kompanııasy elektr qaýaty artyqtaý Qazaqstannyń ortalyq jáne soltústik óńirlerin energııa tapshylyǵy baıqalatyn ońtústikpen baılanystyratyn jelini salyp jatyr. Sonymen qatar ońtústik aımaqta elektr energetıkasyn damytýdyń basqa da jobalary bolashaqta josparlanǵan baǵyttarda eksporttyq áleýetti arttyrýǵa jol ashady. Qazirgi ýaqytta Qazaqstan elektr qýatyn Reseıge eksporttap jatyr.