Qazaqstan óz ádebı murasyn álemdik mádenıettiń altyn qoryna qospaq - sheteldik aýdarmashylar

ALMATY. QazAqparat - QR Tuńǵysh Prezdenti Nursultan Nazarbaev bastaǵan «Rýhanı jańǵyrý» baǵdarlamasy Qazaqstan halqynyń bilim, óner, ádebıet jáne tarıh salasynda jańǵyrýyna múmkindik berdi. Osyndaı oıymen búgin alǵashqy 60 avtordyń álem tiline aýdarylǵan kitaptarynyń tusaýkeserinde Kembrıdj ýnıversıteti Halyqaralyq seriktestik bóliminiń jetekshisi Ennı Mısheılıdoý bólisti, dep habarlaıdy QazAqparat tilshisi.

Onyń aıtýynsha, «Rýhanı jańǵyrý» baǵdarlamasy qazaq ádebıetiniń áleýetin ashýǵa, arttyrýǵa yqpal etetin aýqymdy joba. Osy baǵdarlama ekonomıkalyq reformalardy bilim berý, óner, ádebıet jáne tarıh salasyndaǵy jańǵyrýmen ushtastyrmaq.

«Qazaq prozasy men poezııasy antologııalaryn aǵylshyn tiline aýdaryp, jarııalaýdy Qazaqstan men Ulybrıtanııa arasyndaǵy tabysty qarym-qatynasqa úles qosatyn joba retinde baǵalaımyz. «Rýhanı jańǵyrý» baǵdarlamasyn júzege asyrýǵa atsalysýymyz - biz úshin asqan mártebe jáne bul qarym-qatynasymyz alda da jalǵasa beredi dep senemiz», - dedi Ennı Mısheılıdoý.

Al frantsýz tiliniń ókili, «Mıshel de Mol» baspasynyń dırektory Terı de lıa Krýa qazirgi qazaq ádebıeti antologııalaryn frantsýz tilinde basyp shyǵarý «Mıshel de Mol» baspasyna buıyrǵan úlken mártebe ekenin aıtty. «Teńizben ushtasqan kókjıekke batatyn kún sáýlesin Shyǵysqa ala kelip, búgin osy jıynǵa qatysý men úshin úlken qýanysh. Qazaq halqy osy tamasha bastamanyń arqasynda aqsha men ekonomıka týraly ǵana aıtatyn álemge óz jan dúnıesin tanytýǵa múmkindik aldy. Óz tarıhyn, salt-dátúrin, ómirdiń poetıkalyq mánin baıandaı bastady. Bul isterge biz tek súısine qyzyǵa qaraımyz», - dedi frantsýz baspasynyń ókili.

Ispandyq «Vızor» baspasynyń ókili Davıd Flores byltyr qarasha aıynda Damý maqsatyndaǵy halyqaralyq seriktestik agenttiginiń qoldaýymen Madrıdte Qazaqstan mádenıeti men ádebıeti ortalyǵy ashylǵanyn tilge tıek etti.

«Qazirgi tańda júzege asyp jatqan zamanaýı qazaq ádebıeti antologııalarynyń ıspan tiline aýdarylýy qazaq ádebıeti men mádenıetiniń ıspantildi álemge tanylýy men taralýyna yqpal etti. Budan bylaı da qazirgi zamanǵy qazaq aqyn-jazýshylarynyń shyǵarmalary ıspan tiline, al ıspan ádebıeti qazaq tiline aýdarylyp, ádebı sabaqtastyq jalǵasa beredi degen senimdemiz. Bunyń jalǵasy retinde byltyr qarasha aıynda Damý maqsatyndaǵy halyqaralyq seriktestik agenttiginiń qoldaýymen Madrıdte Qazaqstan mádenıeti men ádebıeti ortalyǵy ashyldy», - dedi ol.

«Qazaqstan Respýblıkasynyń Tuńǵysh Prezıdenti Nursultan Nazarbaevtyń bastamasymen qolǵa alynǵan «Rýhanı jańǵyrý» syndy mańyzdy strategııalyq baǵdarlama aıasynda júzege asyp jatqan «Jahandaǵy zamanaýı qazaqstandyq mádenıet» jobasyna aralasqanyma ózimdi erekshe baqytty sezinemin. Osy joba aıasynda qazaq ádebıeti jaýharlary arab tiline aýdarylýy - qazaq eli men arab álemin baılanystyratyn altyn kópir ispettes», - dedi «Media Hab» baspasynyń dırektory Abdýlrahım Abdýlýahıd.

Qytaı baspasynyń ókili Pıao On Ry Qazaqstan ádebıeti men mádenıetin ózge álemge tanystyrý buryn-sońdy bolmaǵan joba dep baǵalady.

«Jahandaǵy zamanaýı qazaqstandyq mádenıet» QR Tuńǵysh Prezıdenti - Elbasy N.Á. Nazarbaevtyń bastamasymen qolǵa alynǵan «Rýhanı jańǵyrý» baǵdarlamasynyń mańyzdy tarmaǵy. Qazaqstan ádebıeti men mádenıetin ózge álemge tanystyrý buryn-sońdy bolmaǵan joba. Qytaı men qazaq mádenıeti uqsas. Qytaıdaǵy «Bir beldeý - bir jol» strategııalyq úndeýi men Qazaqstannyń «Nurly jol» strategııalyq jospary barynsha qabysyp, eki eldiń mádenıet aýys-túıisi úzdiksiz tereńdep keledi. Baspamyz Qazaqstanda tyǵyz qarym-qatynas ornatyp, eki eldiń tańdaýly kitaptaryn ózara aýdaryp, basyp shyǵarýda. Osy oraıda eki el mádenıetin baılanystyrýshy kópir qyzmetin atqaryp otyrǵanymyzǵa qýanyshtymyz», - dedi Qytaı tiliniń ókili Pıao On Ry.

Aıta ketý kerek, búgin Almatyda qazaq avtorlarynyń BUU 6 tiline aýdarylǵan antologııalarynyń tusaýkeseri ótti.