Qazaqstan ótken jyly 56 mln dollardyń balyq ónimderin eksporttady

ASTANA. QazAqparat - Qazaqstan ótken jyly quny 56 mln AQSh dollary bolatyn 24,6 myń tonna balyq ónimderin eksporttady. Bul jaıynda QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.

«Sonyń ishinde Qytaıǵa 2,9 myń tonnalyq balyq ónimderi satylǵan. Qazirgi ýaqytta el aýmaǵynda 11 kásiporynnyń Eýropalyq Odaqqa balyq ónimderin eksporttaý quqyǵy bar», - dep jazady Sáken Dildahmet.

Onyń keltirgen málimetine súıensek, Qazaqstan men Qytaı arasyndaǵy naryqtyń aıasyn keńeıtý maqsatynda veterınarlyq sertıfıkat kelisilgen. Onyń ústine QHR tizimine 41 qazaqstandyq kásiporyn engizilgen. Sonymen birge, tizimge ený týraly taǵy 10 otandyq kásiporynnyń ótinimi qaralyp jatyr.

«2018 jyly balyq ónimderiniń ımporty jalpy somasy 70,7 mln AQSh dollary bolatyn 34,3 myń tonnany qurady. Importtyń 80 paıyzy - muhıt balyqtary men teńiz ónimderi. Negizi ımporterler: AQSh (17,9 mln AQSh dol.), Japonııa (11,7 mln AQSh dol.), Qytaı (8,0 mln AQSh dol.), Ispanııa (6,8 mln AQSh dol.), Vetnam (6,1 mln AQSh dol.), Frantsııa (5,4 mln AQSh dol.), Italııa (5,1 mln AQSh dol.), Germanııa (4,7 mln AQSh dol.) jáne taǵy basqalary», - dep jazady Sáken Dildahmet.