Qazaqstan osy aıda Germanııaǵa taǵy 20 myń tonna munaı jetkizbek

ASTANA. QazAqparat - «QazTransOıl» aktsıonerlik qoǵamy naýryzda Germanııaǵa kelesi 20 myń tonna munaı tranzıtin júzege asyrýdy josparlap otyr, dep habarlaıdy QazAqparat atalǵan kompanııanyń baspasóz qyzmetine silteme jasap.

«Qazaqstan Respýblıkasynyń Energetıka mınıstrligi bekitken munaıdy tasymaldaý kestesine sáıkes «QazTransOıl» AQ naýryz aıynda Germanııaǵa «Transneft» JAQ magıstraldyq munaı qubyry júıesi boıynsha «Adamova zastava» munaı tapsyrý pýnkti arqyly 20 myń tonna munaıdy tasymaldaýdy josparlap otyr», - dedi «QazTransOıl» AQ qoǵammen baılanys jáne ishki kommýnıkatsııalar departamentiniń dırektory Shyńǵys Іlııasov.

Sonymen qatar atalǵan kompanııa bıylǵy jyldyń 1 toqsanynda Germanııaǵa «Adamova zastava» munaı tapsyrý pýnkti arqyly 300 myń tonna munaı tasymaldaý úshin tehnıkalyq múmkindiktiń baryn rastaıdy. Degenmen onyń naqty kólemi munaı kompanııalarynyń ótinimine baılanysty bolmaq.

Sondaı-aq, habarlamada aqpanda elimizden Germanııaǵa 20 myń tonna munaıdyń birinshi partııasy jetkizilgeni aıtylǵan.

Buǵan deıin Energetıka mınıstri Bolat Aqsholaqov Germanııaǵa alǵashqy munaı partııasyn aqpannyń sońyna deıin jóneltiletini týraly aıtqan edi.