Qazaqstan Ortalyq Azııanyń turaqtylyǵyna qarajat aıamaıdy - depýtat Áshimbaev

ASTANA. QazAqparat - QR Parlament Májilisiniń depýtaty Máýlen Áshimbaevtiń aıtýynsha, Ortalyq Azııada turaqtylyq bolmaı, Qazaqstannyń damýy ekitalaı. Sondyqtan Qazaqstan kez kelgen ýaqytta aımaqtyń turaqtylyǵyna qatysty qarajat bólýge daıyn, dep habarlaıdy QazAqparat tilshisi.

«Iá, Ortalyq Azııada turaqtylyq bolmasa, Qazaqstannyń oıdaǵydaı damýy da múmkin emes. Biz ony jaqsy túsinemiz. Sol sebepti Qazaqstan aımaqtyń turaqtylyǵyna qarajat quıýǵa árkez daıyn. Osyǵan baılanysty tıisti normatıvtik-quqyqtyq aktiler de maquldandy. Máselen, Qyrǵyzstanǵa 100 mln AQSh dollary kóleminde kómek berý týraly shart bar. Atalǵan kómekke taýarlar men qyzmetter de kirdi. Degenmen, basym bóligi - qarajat. Jalpy, bizde arnaıy zańnama bar. Oǵan sáıkes, Qazaqstan aımaqtyń damýyna oń áser etetin jobalar men bastamalardy qarjylandyra alady», - dedi Máýlen Áshimbaev búgin Astanada bastalǵan konferentsııada.

Onyń aıtýynsha, Qazaqstan BUU Qaýipsizdik keńesiniń turaqty emes músheligine alynǵanda Ortalyq Azııanyń turaqtylyǵy máselesin basty baǵdar dep belgilegen bolatyn. Osy oraıda aımaqty damytý men qaýipsizdik sharalaryn nyǵaıtý máselesi joǵary deńgeıde kóterýdi kózdeıdi. «Bizdiń dıplomattar BUU Qaýipsizdik keńesinde osy máseleni jan-jaqty talqylap, álemdik qaýymdastyqqa jetkizetin bolady. Qazirdiń ózinde birqatar sharalar qolǵa alynyp otyr», - dep atap kórsetti depýtat.

Aıta keteıik, búgin Astanada Qazaqstannyń strategııalyq zertteýler ınstıtýtynyń uıymdastyrýymen Ortalyq Azııadaǵy qaýipsizdik máselelerine arnalǵan jyl saıyn ótetin konferentsııa bastaldy . Bıylǵy konferentsııanyń taqyryby - «Jahandyq transformatsııa jaǵdaıyndaǵy Ortalyq Azııa». Jıynǵa Ózbekstan, Qyrǵyzstan, Qytaı men Reseıdiń sarapshylary qatysýda.