Qazaqstan organıkalyq bıdaı eksporttaýshy elder arasynda tórtinshi orynda
Zań jobasyn Parlamentiniń depýtattary organıkalyq ónim óndirý jáne onyń aınalymy salasyndaǵy zańnamany jetildirý úshin ázirledi.
«Jahandaný jaǵdaıynda elimizde básekelestikke belsendi aýyl sharýashylyǵyn qalyptastyrý úshin osy saladaǵy kúrdeli máselelerdi sheshý mańyzdy. Álemdik tájirıbe kórsetip otyrǵandaı, organıkalyq aýyl sharýashylyǵyn damytýdyń mańyzy óte zor, óıtkeni ol, perspektıvalyq baǵyt jáne de agrarlyq salanyń rentabeldiligin, básekege qabilettiligin arttyrýǵa yqpal etedi. Qazirgi kezde organıkalyq ónimderdiń álemdik naryǵy 120,6 mıllıard eýrony qurady jáne ol belsendi ósip keledi. Keıingi 20 jylda onyń kólemi 7 esege ósti, ıaǵnı sala álemdik trendke aınalyp otyr. Halyqaralyq uıymdardyń baǵalaýy boıynsha organıkalyq ónim eksporty boıynsha Qazaqstan 123 eldiń ishinde 9-orynda, organıkalyq bıdaı eksporttaýshy elder arasynda 4-orynda, Evropa odaǵyna organıkalyq maıly zyǵyr tuqymyn eksporttaý boıynsha 6-orynda», - dedi Á. Bektaev.
Sonymen qatar ol 2015 jyly elimizde «Organıkalyq ónimderdi óndirý týraly» Zańy qabyldanǵanyn eske saldy.
«Alaıda bul zań, sala mamandary men ekspertteriniń pikiri boıynsha otandyq organıkalyq ónim óndirýshilerdiń zańdy múddelerin tolyq qorǵaı almaı otyr jáne organıkalyq óndiristi júrgizýdiń halyqaralyq tájirıbesine sáıkes kelmeıdi. Osyǵan baılanysty, VII shaqyrylymnyń Parlament depýtattary bastamasymen «Organıkalyq ónim óndirý jáne onyń aınalymy týraly» (jańa redaktsııa), «Qazaqstan Respýblıkasynyń zańnamalyq aktilerine organıkalyq ónim óndirý jáne onyń aınalymy máseleleri boıynsha ózgerister men tolyqtyrýlar engizý týraly» jáne Qazaqstan Respýblıkasynyń Ákimshilik quqyq buzýshylyq týraly Kodeksine tolyqtyrýlar engizý týraly Qazaqstan Respýblıkasy Zańdarynyń jobalary ázirlendi. Zań jobalarynyń negizgi maqsaty – organıkalyq ónim óndirý salasyndaǵy zańnamany jetildirý», - dedi senator.