Qazaqstan OPEK kelisiminen shyqpaıdy - Bozymbaev

ASTANA. QazAqparat - Qazaqstan munaı óndirýdi shekteý jónindegi kelisimnen shyǵýdy kózdemeıdi. Búgin «Jasyl kópir» seriktestik baǵdarlamasy» halyqaralyq forýmy barysyndaǵy  baspasóz máslıhatynda QR Energetıka mınıstri Qanat Bozymbaev osylaı málim etti, dep habarlaıdy QazAqparat.

«Qazaqstan qol qoıǵan barlyq kelisimder boıynsha ózimizdiń mindettemelerdi oryndaýǵa tyrysamyz. Bizdiń mindetterge ótken jyly qol qoıylǵan bolatyn, al bıyl OPEK jáne oǵan múshe emes elder Sammıtinde atalǵan kelisim uzartyldy. Osy kelisimderdiń arqasynda  birinshi toqsanda ortasha alǵanda berreline 52 dollar baǵamen eksportqa munaı satyldy. Salystyratyn bolsaq, bul kelisimge deıin, ıaǵnı 2016 jyldyń birinshi toqsanynda Brent munaıynyń quny 32 dollar boldy»,-dedi Bozymbaev.

Osy oraıda ol Qazaqstan qandaı da bir kelisimnen shyǵýdy qarastyryp otyrmaǵandyǵyn atap ótti.

Esterińizge salsaq, keıbir BAQ-tar Qazaqstan munaı óndirý kólemin arttyra otyryp, OPEK-pen aradaǵy kelisimnen birtindep shyǵýdy kózdep otyrǵandyǵyn habarlaǵan bolatyn.

Aıta keteıik, ótken jyldyń 9 jeltoqsanynda OPEK pen oǵan múshe emes 11 el arasynda 1 qańtardan bastap táýligine óndiriletin munaı kólemin 1,8 mln barrelge deıin qysqartý týraly kelisim jasaldy. Eń úlken kólemdi Reseı qysqartady. Venada ótken kezdesýde kelisimdi 2018 jyldyń sáýirine deıin sozý týraly sheshim qabyldandy.