Qazaqstan OPEK + kelisimi aıasynda qabyldanǵan mindettemelerdi oryndaýda

NUR-SULTAN. QazAqparat - Qazaqstan OPEK+ qatysýshy elder arasynda 2020 jyldyń mamyr-shilde aılarynda munaı óndirýdi táýligine 9,7 mln barrelge deıin ujymdyq qysqartý týraly kelisim boıynsha jańa mindettemelerge qosyldy, dep habarlaıdy QazAqparat tilshisi QR Energetıka mınıstrliginiń baspasóz qyzmetine silteme jasap.

OPEK + kelisimine qatysý suranys pen usynys teńgerimin jáne munaı baǵasyn qalpyna keltirýge baǵyttalǵan. Qoımalarda munaıdyń tolyp ketý qaýpin boldyrmaý úshin Energetıka mınıstrligi orta, iri jáne alyp ken oryndarynda óndiristi shekteý týraly sheshim qabyldaǵan bolatyn. Ken oryndarynyń barlyq túrleri úshin munaı óndirýdi qysqartý boıynsha mindettemelerdi ádil bólý kózdeldi.

Qazaqstan óz mindettemelerin oryndaý úshin barlyq qajetti sharalardy qabyldaıdy. Kelisimge sáıkes Qazaqstannyń shilde aıyndaǵy mindettemeleri táýligine 1,319 mln barreldi quraıtyn. Aldyn ala málimetter boıynsha, shilde aıynda ortasha táýliktik óndirý táýligine 1,313 mln barrel nemese mindettemelerdiń 101%-yn qurady. Respýblıka Kelisimniń mindettemelerin oryndaǵany týraly derekterdi OPEK + hatshylyǵyna joldady.

Mámilege qatysýdyń arqasynda naryqtyń barlyq qatysýshylary munaı óndirýdiń baqylanatyn jáne birtindep tómendeýine qol jetkizdi, bul óz kezeginde álemdik munaı salasyna oń áser etip otyr.