Qazaqstan OPEK elderi aldyndaǵy mindettemesin oryndaýda

ASTANA. QazAqparat - Qazaqstan munaı eksporttaýshy elder uıymy aldyndaǵy mindettemesin oryndaýda. Bul týraly búgin Úkimet úıinde ótken brıfıngte QR Energetıka mınıstri Qanat Bozymbaev málim etti, dep habarlaıdy QazAqparat.

«Qańtar aıynda biz óz mindettemelerimizdi oryndaǵanymyzdy, tipti artyǵymen oryndaǵandyǵymyzdy aıta alamyn. Eger sizderdiń esterińizde bolsa, biz OPEK pen basqa da munaı óndirýshi elder aldynda qarashadaǵy deńgeıden 20 myń barrelge kem óndirý mindettemesin alǵan bolatynbyz. Іs júzinde ony artyǵymen oryndap, qańtarda 30 myń barrelden astam munaı kem óndirdik. Aqpanda da mindettemeni oryndaımyz degen úmittemin. Tipti, óndirý kólemin sál asyryp jibersek te, ol qańtardaǵy kem óndirilgenniń esebinen ornyn jabady»,- dedi mınıstr.

Sonymen qatar ol OPEK-ke múshe elderdiń 95 paıyzy ózderine alǵan mindettemeni tolyqtaı oryndaǵandyǵyn basa aıtty.

«Sonyń arqasynda baǵa 56-57 dollar deńgeıinde tur jáne qor da birtindep qysqara bastady» - dedi Bozymbaev.

Aıta keteıik, ótken jyly kartel músheleri óndiris kólemin táýligine 1 mln 200 myń barrelge qysqartýǵa kelisken bolatyn. Al OPEK elderine kirmeıtin Qazaqstan sııaqty elder munaı óndirýdi táýligine barlyǵy 558 myń barrelge qysqartýǵa kelisti. Onyń negizgi salmaǵyn Reseı ózine aldy. Ol óndiristi táýligine 300 myń barrelge azaıtatyn boldy. Ázerbaıjan 35 myńǵa, Meksıka 100 myńǵa qysqartýǵa kelisti.