Qazaqstan OPEK aldyndaǵy óz mindettemesin oryndaıdy

ASTANA. QazAqparat - Qazaqstan Munaı eksporttaýshy elder uıymy (OPEK) aldyndaǵy óziniń munaı óndirý kólemin qysqartý mindettemesin oryndaıdy.  Bul týraly  búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen elimizdiń Energetıka mınıstri Qanat Bozymbaev málim etti, dep habarlaıdy QazAqparat.

Esterińizge sala ketsek,  Qazaqstan  OPEK-ke aǵymdaǵy jyldyń birinshi jartyjyldyǵynda munaı óndirý kólemin 2016 jyldyń qarashasynda tirkelgen táýligine 1,7 mln. barrelden kúninen 20 myń barrel kem óndirýge ýáde bergen edi.

«Qazaqstan mindettemeni jarty jylǵa alyp otyr. Olar  bizge  alty aı boıy 1,7 mıllıonnan (táýligine) 20 myń barrel qysqartyp otyrýymyz qajet deıdi. Qańtarda, nemese aqpan men naýryzda qansha kólemdi qysqartýymyz qajetti týraly ádisteme joq. Sóz ortasha eseppen 6 aıdyń ishindegi kólem jaıynda  bolyp otyr. Biz ony ustanamyz degen oıdamyz», - dedi Bozymbaev.

Aıta keterligi, osy jyldyń naýryz aıynyń basynda Energetıka mınıstri Qazaqstannyń munaı eksporttaýshy elder uıymy aldyndaǵy mindettemesin oryndap otyrǵandyǵyn aıtqan bolatyn. https://kaz.inform.kz/news/kazakstan-opek-elderi-aldyndagy-mindettemesin-oryndauda_a3004439

Al sol aıdyń sońǵy kúnderinde taǵy da BAQ ókilderiniń saýalyna jaýap bere kele Bozymbaev elimiz munaı óndirý kólemin qasqarpaıtynyn, biz tek arttyra alatynymyzdy jetkizgen edi. https://kaz.inform.kz/news/opek-ayasynda-kazakstan-munay-ondirudi-kyskarta-ma_a3011617

Este bolsa,  ótken jyly kartel músheleri óndiris kólemin táýligine 1 mln 200 myń barrelge qysqartýǵa kelisken bolatyn. Al OPEK elderine kirmeıtin Qazaqstan sııaqty elder munaı óndirýdi táýligine barlyǵy 558 myń barrelge qysqartýǵa kelisti. Onyń negizgi salmaǵyn Reseı ózine aldy. Ol óndiristi táýligine 300 myń barrelge azaıtatyn boldy. Ázerbaıjan 35 myńǵa, Meksıka 100 myńǵa qysqartýǵa kelisti.