Qazaqstan onkologııalyq naýqastardy emdeýde qaı elderdiń tájirıbesin negizge alady

ASTANA. QazAqparat – Redaktsııamyzdyń resmı saýalyna jaýap bergen Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Azamat Dúısenov onkologııalyq naýqastardy emdeýde qandaı elderdiń tájirıbesi qoldanylatynyn málim etti, dep habarlaıdy QazAqparat tilshisi.

«Kóptegen elderde onkologııalyq aýrýlardy emdeý salasyndaǵy óz jetistikteri bar. Birinshi kezekte, óz tıimdiligin kórsetken, suranysqa ıe jáne joǵary tıimdi jabdyqtyń bolýyn eskere otyryp, Qazaqstanda engizilýi múmkin tehnologııalar qabyldanady. Qazirgi ýaqytta álemde onkoortopedııada 3D tehnologııasynyń ártúrli ádisteri belsendi qoldanylady jáne damýda. Operatsııanyń bul túri hırýrgııalyq toptyń arnaıy daıyndyǵyn, anestezıologııalyq quraldardyń kásibıligin, zamanaýı jabdyqtardyń bolýyn talap etedi. Aıta ketý kerek, bul baǵytta onkoortopedııanyń álemdik kóshbasshylarynyń biri – Qytaı», - dedi Azamat Dúısenov tilshi saýalyna oraı.

Departament dereginshe, elimizde qaterli isikti emdeý Eýropalyq standarttarǵa saı júrgiziledi.

«Qazaqstanda onkologııalyq dıagnoz bar naýqastarǵa júretin emdeý tásilderi men dıagnostıkasynyń hattamalary Eýropalyq talaptarǵa sáıkes keledi. ıAǵnı, elimizde onkologııaǵa qarsy emniń keń taralǵan túrleri kórsetiledi. Eger onkologııalyq naýqastardy emdeý kezinde keıbir tehnologııalar men qyzmetter elde joq jáne kórsetilimder kezinde bul patsıentter tegin medıtsınalyq kómektiń kepildik berilgen kólemi sheńberinde qajet qyzmetterdi kórsetetin sheteldik klınıkalarǵa emdelýge jiberiledi», - dep jazylǵan Azamat Dúısenovtiń jaýabynda.

Qosa ketsek, Qazaqstanda onkologııamen aýyratyn 210 myńnan astam adam esepte tur.

Keıingi 2 jylda jastardan qaterli isik jıi anyqtalyp jatyr.

Jalpy jyl saıyn onokologııaǵa shaldyqqan naýqastardy emdeýge 36 mlrd teńge bólinedi.