Qazaqstan óńirlerinde «Bolashaq» túlekteriniń saıabaqtary paıda bolady

ASTANA. QazAqparat  - Qazaqstan óńirlerinde «Bolashaq» túlekteriniń saıabaqtary paıda bolýy múmkin.  «Halyqaralyq baǵdarlamalar ortalyǵy» AQ prezıdenti Janbolat Meldeshev osyndaı bastama kóterdi, dep habarlaıdy QazAqparat.

«Árbir óńirde «Bolashaq» túlekteriniń saıabaǵyn jasaýdy usynamyn. Atap aıtqanda, biz halyq pen memlekettiń esebinen álemniń úzdik oqý oryndarynda bilim aldyq. Osy rette memleketimizdiń múddesi úshin qajyrly eńbek etýge daıynbyz. Qazirgi ýaqytta árbir óńirde saıabaq ashý jobasyn bastaý usynysy bar. Eger de ákimdikter jer telimin berse, onda biz óz esebimizden saıabaqty tolyqtaı kóriktendirip shyǵar edik. Bul baǵyttaǵy qadamdar elimizge, halqymyzǵa, memleketimizge alǵysymyzdy jetkizýdiń bastamasy retinde baǵalanar edi»,-dedi Meldeshev.

Osy oraıda ol óz sózinde «Bolashaq» túlekteri jastarǵa men balalarǵa úlgi bolarlyq áreketter jasaýy tıis ekendigin atap ótti.

Budan bólek, J. Meldeshev baǵdarlama stıpendıanttary sanyn arttyrý úshin stýdentterdi shetelge úkimetaralyq kelisimder aıasynda baǵyttaý josparlanyp otyrǵandyǵyn jetkizdi. Búginde kóptegen memleketter ózderiniń ýnıversıtetterinde qazaqstandyq jastarǵa oryndar usynýǵa ázir kórinedi.