Qazaqstan óńirdiń jáne tutas álemniń ál-aýqatyn qamtamasyz etý jaıly syndarly ıdeıalar men kózqarastardy talqylaýǵa árqashan daıyn - N.Nazarbaev
«Qurmetti Astana ekonomıkalyq forýmyna qatysýshylar jáne bizdiń elimizdiń qonaqtary! Qonaqjaı qazaq jerine búgingi forýmǵa qatysý úshin barshalaryńyzdyń ýaqyt bólip, bizdiń eldi qurmettep kelgenderińiz úshin shyn júregimnen rızashylyǵymdy bildiremin. Astana ekonomıkalyq forýmy san túrli máselelerdi talqylaýdyń jáne naqty sheshimder qarastyrýdyń mańyzdy alańyna aınalyp keledi. Birikken Ulttar Uıymy, Ekonomıkalyq yntymaqtastyq jáne damý uıymy, Dúnıejúzilik saýda uıymy sııaqty jahandyq, halyqaralyq uıymdarmen qatar Dúnıejúzilik bank, Eýropalyq qaıta qurý jáne damý banki, Azııa damý banki sııaqty halyqaralyq qarjy uıymdarynyń óklideri osy forýmnyń turaqty qonaqtary bolyp keledi», - dedi Elbasy.
QR Prezıdenti bıyl forým qatysýshylarynyń qataryn Halyqaralyq valıýta qory, Boao ekonomıkalyq forýmy sııaqty uıymdar men álemge tanymal basylymdar tolyqtyra túskenin basa aıtty. Forým jumysyna álemge áıgili ǵalymdar, Nobel syılyǵynyń ıegerleri, sonymen birge álemdik ınvestorlar, Amerıkanyń, Eýropanyń, Azııanyń iri korporatsııalarynyń ókilderi de qatysyp jatqanyn atap ótti.
«Qazaqstan ekonomıkalyq jáne áleýmettik damý týraly, óńirdegi jáne tutas álemniń ál-aýqatyn qamtamasyz etý jaıly syndarly ıdeıalardy, kózqarastardy talqylaýǵa árqashan daıyn. Bıyl biz irgeli taqyryp jańa ekonomıkalyq naqty ahýaldy talqylaıtyn bolamyz. Jańa naqty ahýaldyń qandaı bolary bizge jáne bizdiń qazirgi tańda jasaıtyn tańdaýlarymyz ben áreketterimizge baılanysty. Osy forýmnyń aıasynda bul kúnderi men dúnıejúziniń kóptegen ǵalymdarymen jáne saıasatkerlerimen, ekonomısterimen kezdestim. Qazaqstandaǵy bolyp jatqan jaǵdaıdy, bizdiń ustanymdy sharalarymyzdy qalaı baǵalaıtyndyǵyn, qandaı keńes beretindigin bólistik. Ol biz úshin óte mańyzdy ári paıdaly zattar edi. Ol úshin de rızashylyǵymdy bildiremin», - dedi N.Nazarbaev.