Qazaqstan ónimderin BAÁ-ge eksporttaý múmkindigi molaıdy

ASTANA. QazAqparat – QR Premer-Mınıstri Álıhan Smaıylovtyń BAÁ-ge sapary aıasynda Qazaqstan ónimderi eksportyn ulǵaıtýǵa múmkindik beretin kelisim jasaldy, dep habarlaıdy QazAqparat Qazaqstan standarttaý jáne metrologııa ınstıtýtynyń baspasóz qyzmetine silteme jasap.

«QR Saýda jáne ıntegratsııa mınıstrligi Tehnıkalyq retteý jáne metrologııa komıteti QazStandart Gulf TEC Certification – ónimniń parsy shyǵanaǵy elderiniń talaptaryna sáıkestigin baǵalaý salasyndaǵy kásiporynmen kelisimge qol qoıdy. Bul kelisim BAÁ, Saýd Arabııasy, Katar, Kýveıt, Oman jetkizýshileriniń tizilimine qosý rásimin aıtarlyqtaı jedeldetýge, saýdadaǵy tehnıkalyq kedergilerdi alyp tastaýǵa, otandyq ónim eksportyn ulǵaıtýǵa múmkindik beredi. Osylaısha, 30-dan astam qazaqstandyq óndirýshiler BAÁ-ge eksportty júzege asyrady, olardyń 9-y – resmı tizilimge engizilgen tamaq jáne aýyl sharýashylyǵy ónimderin jetkizýshiler. Óndirýshiler búgingi kúni elden shyqpaı-aq, Halal sertıfıkatyn ala alady», - delingen baspasóz málimdemesinde.

Qazaqstan BAÁ halyqaralyq akkredıtteý ortalyǵynan Halal ónimderin sertıfıkattaýdy júrgizýge «QazStandartty» akkredıtteý týraly resmı qujat aldy.

Buǵan deıin habarlaǵanymyzdaı, Birikken Arab Ámirlikterine resmı sapary barysynda QR Premer-Mınıstri Álıhan Smaıylov BAÁ Premer-Mınıstriniń orynbasary – Prezıdent Ákimshiliginiń mınıstri sheıh Mansýr ben Zaıd Ál Nahaıanmen kezdesý ótkizdi.

Ekijaqty kezdesýlerdiń qorytyndysy boıynsha QR Premer-Mınıstriniń qatysýymen ekonomıkanyń túrli sektorlarynda jalpy somasy $900 mln bolatyn birqatar ekijaqty kommertsııalyq qujattarǵa qol qoıyldy.