Qazaqstan ólketanýshylarynyń tuńǵysh odaǵy quryldy

ASTANA. QazAqparat - «Kıeli Qazaqstan» kartasyn jasaý jumysyna Qazaqstannyń barlyq ólketanýshylary men mýzeı qyzmetkerlerin tartý maqsatynda tuńǵysh ólketanýshylar odaǵy quryldy. Bul týraly búgin «Qazaqstannyń kıeli jerleriniń geografııasy» jobasyn júzege asyrý jónindegi jumys tobynyń birinshi respýblıkalyq forýmynda belgili boldy, dep habarlaıdy QazAqparat tilshisi.  

«Tuńǵysh ret qurylǵan Qazaqstannyń ólketanýshylar odaǵy óz isine shyn berilgen, Qazaqstan tarıhynyń qaıta túleýine ómirin arnaǵan naǵyz mamandardyń basyn qosatyn qoǵamdyq uıymǵa aınalady dep senemin», - dedi QR Mádenıet jáne sport mınıstri Arystanbek Muhamedıuly.

«Sakraldy Qazaqstan» ǵylymı-zertteý ortalyǵynyń dırektory Berik Ábdiǵalıuly atalǵan odaqtyń ólketanýshylardyń birqatar máselelerin sheshýge septigi tıetinin erekshe atap ótti.

«Bul odaq ólkentaný jumystaryna úlken serpin berýi kerek. Mınıstrlik (Mádenıet jáne sport mınıstrligi - red.) quzyrynda kóptegen múmkinshilikter bar. Ásirese, ólketanýshylardyń shyǵara almaı júrgen eńbekterin, kitaptaryn jáne ózge de shyǵarmashylyq týyndylaryn jınaqtap, serııalyq kitaptar shyǵarý máselesin búgin mınıstrlikpen talqyladyq», - dedi ol. 

Aıta keteıik, Qazaqstanyń kıeli jerleriniń kartasy Memleket basshysynyń «Bolashaqqa baǵdar: rýhanı jańǵyrý» maqalasynda aıtylǵan negizgi ıdeıalardy júzege asyrý aıasynda qolǵa alyndy. Prezıdent Ulytaý tórindegi jádigerler keshenin, Qoja Ahmet ıAsaýı mavzoleıin, Tarazdyń ejelgi eskertkishterin, Beket ata kesenesin, Altaıdaǵy kóne qorymdar men Jetisýdyń kıeli mekenderin jáne basqa da oryndardy ózara sabaqtastyrýdy tapsyrdy.