Qazaqstan ólim jazasyn alyp tastaýǵa burynǵydan da jaqyndaı tústi - halyqaralyq komıssııa

NUR-SULTAN. QazAqparat - Ólim jazasyna qarsy halyqaralyq komıssııa (ÓJHK) Qazaqstannyń ólim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige Ekinshi Fakýltatıvtik hattamany ratıfıkatsııalaýyn quptaıdy, dep habarlaıdy QazAqparat. Bul týraly QR Syrtqy ister mınıstrligine silteme jasap habarlaıdy.

ÓJHK prezıdenti Navı Pılleı Qazaqstannyń Ortalyq Azııany ólim jazasynan ada aımaq bolýǵa jaqyndatatyn mańyzdy qadam jasaǵanyn aıtady.

«Bul - erekshe sheshim, óıtkeni el - ÓJHK qoldaý tobynyń mańyzdy múshesi. Qazaqstannyń osy tarıhı sheshiminiń arqasynda búkil álem ólim jazasyn alyp tastaýǵa burynǵydan da jaqyndaı tústi», - deıdi N. Pılleı.

Prezıdent Qasym-Jomart Toqaev bıylǵy joldaýynda ólim jazasyna tyıym salý týraly sheshimdi birjola bekitý úshin Konstıtýtsııaǵa tıisti ózgeris engizý qajet dep sanaıtynyn jetkizgen bolatyn. Komıssııa Memleket basshysynyń bul usynysyn oń baǵalady. «Mundaı konstıtýtsııalyq túzetý Qazaqstanda ólim jazasynyń kúshin joıýdy odan ári nyǵaıtatyny jáne búginde álemde orny joq osy qatygez, adamgershilikke jatpaıtyn jazaǵa núkte qoıatynyn» aıtady.

Aıta ketsek, Qazaqstan - ÓJHK qoldaý tobynyń negizin qalaýshylardyń biri. Komıssııa jumysyn ólim jazasynyń kúshin joıýdy jaqtaýshy 23 múshe-memleketten turatyn geografııalyq ár túrli top qoldaıdy. Hatshylyǵy Madrıdte ornalasqan.

Sonymen qatar Qazaqstanda ólim jazasy Konstıtýtsııadan alynyp tastalady. Bul týraly QR Ulttyq ekonomıka mınıstri Álibek Qýantyrov aıtty.