Qazaqstan oqýshylarynyń 75% tolyq otbasynda turady

ASTANA. QazAqparat – Qazaqstan oqýshylarynyń 75%-ǵa jýyǵy ata-anasymen birge turady. Mundaı derekter Qazaqstan oqýshylarynyń ómir salty faktorlary, olardyń fızıkalyq, psıhıkalyq densaýlyǵy men ál-aýqaty týraly esepte jarııalanǵan, dep habarlaıdy QazAqparat tilshisi.

Atalǵan qujatta 11, 13 jáne 15 jastaǵy 7400-den astam mektep oqýshysynyń aýqymdy derekteri jınaqtalǵan. Esep 2022 jylǵy «Mektep jasyndaǵy balalardyń densaýlyqqa qatysty minez-qulqy» (HBSC) zertteýine negizdelgen.

«Balalardyń 74,9%-y ata-anasymen birge turady. Onyń ishinde balalardyń 72,9%-y ákesi jáne anasymen, 1,7%-y anasy jáne ógeı ákesimen, 0,3%-y ógeı sheshesi jáne ákesimen turady. 21,4%-y anasymen, 3,1% - y ákesimen, 0,6%-y patronattyq tárbıede turady», - delingen habarlamada.

Ata-anasymen birge turatyn balalardyń 68%-ynda ákesi de, anasy da jumys isteıdi, 26,1%-ynda bireýi ǵana jumys istese, 1,7%-ynda ekeýi de jumyssyz.

Otbasynyń áleýmettik-ekonomıkalyq deńgeıi boıynsha tabysy tómen balalardyń úlesi – 19,4%, ortasha deńgeıde – 61%, joǵary deńgeıde – 19,6% bala bar. Bul rette, ótken jyly 2018 jylmen salystyrǵanda ortasha jáne joǵary tabysy bar otbasynan shyqqan oqýshylardyń paıyzy ósti jáne tómen tabysy bar otbasylar azaıǵan.

Taldaý barysynda anyqtalǵandaı, jasóspirimderge ákelerine (80,4%) qaraǵanda analarymen (89,4%) ne qyzyqtyratyny týraly sóılesý ońaıyraq. 15 jasqa qaraı ásirese qyzdarda ata-anamen qarym-qatynas sapasy nasharlaıdy. Barlyq jastaǵy uldar qyzdarǵa qaraǵanda anasymen jáne ákesimen qarym-qatynas jasaý ońaı ekenin jıi aıtady.

Kún saıyn oqýshylardyń 78,4%-y otbasymen bir dastarhanda tamaqtanady.

Jasóspirimderdiń kópshiligi (76%) otbasynyń úlken qoldaýyn sezinedi. Bul kórsetkish qyzdarǵa qaraǵanda uldarda joǵary, jasyna qaraı bul kórsetkish tómendeıdi. 2018 jyldan bastap 2022 jylǵa qaraı otbasynyń qoldaýy joǵary balalardyń úlesi 5%-ǵa tómendegeni baıqalady. Ortasha alǵanda, balalardyń 64,9%-y dostarynyń qoldaýy kóbirek ekenin aıtqan.