Qazaqstan ókilderi DDSU-nyń Eýropalyq aımaqtyq bıýrosynyń 70-sessııasyna qatysýda

NUR-SULTAN. QazAqparat - QR Densaýlyq saqtaý mınıstrliginiń ókilderi DDSU Eýropalyq óńirlik komıtetiniń 70-sessııasyna qatysýda, dep habarlaıdy QazAqparat QR Densaýlyq saqtaý mınıstrligniń Facebook paraqshasyna silteme jasap.

«Búgin DDSU Eýropalyq aımaqtyq bıýrosynyń 70-sessııasy bastaldy, COVID-19 pandemııasyna baılanysty bıyl jıyn alǵash ret vırtýaldy formatta ótedi. Eýropa aımaǵyndaǵy DDSU-ǵa múshe 53 memlekettiń densaýlyq saqtaý mınıstrleri men ózge de joǵary laýazymdy azamattar, sondaı-aq seriktes uıymdar men azamattyq qoǵam ókilderi eki kún boıy densaýlyq saqtaý salasyndaǵy túrli máseleni talqylaıdy»-delingen habarlamada.

Qysqartylǵan sessııanyń kún tártibindegi negizgi taqyryptardyń biri: aımaqtaǵy jáne álemdegi COVID-19 pandemııasyna qarsy is-qımyl men tájirıbe, 2020-2025 jyldarǵa arnalǵan densaýlyq saqtaýdy jaqsartýǵa baǵyttalǵan jańa Eýropalyq baǵdarlama.

Sessııanyń alǵashqy kúngi baǵdarlamasynda Danııanyń Uly mártebeli kronhanshaıymy sóz sóıleıdi dep josparlanýda. Budan keıin Eýropalyq óńirlik komıteti jıyrma jetinshi shaqyrylymnyń Turaqty komıtetiniń esebi tyńdalyp, tıisti qarardyń jobasy qabyldanady.

Sondaı-aq, DDSU bas dırektory doktor Tedros Adhanom Gebreıesýs aımaqtyq komıtet sessııasynyń delegattary aldynda sóz sóıleıdi. Ol álemdegi jaǵdaıǵa, sonyń ishinde COVID-19 pandemııasymen kúresý tájirıbesine sholý jasaıdy.

Sessııa otyrystary aǵylshyn jáne orys tilderinde kórsetiledi. Sonymen qatar, halyqaralyq jıyn DDSU Eýropalyq aımaqtyq bıýrosynyń arnalary arqyly jarııalanady

DDSU Eýropalyq óńirlik bıýrosynyń sessııasy Nur-Sultan qalasynyń ýaqyty boıynsha saǵat 13:00-de tikeleı efırde bastalady. Ony myna siltemeden kórýge bolady.

https://www.euro.who.int/ru/about-us/governance/regional-committee-for-europe/70th-session/news/news/2020/09/health-priorities-for-the-european-region-and-covid-19-in-focus-at-who-annual-meeting?fbclid=IwAR1rKvlbTOwAtJAwbGlGVh127cEGZjvQBMEBP7gD2nscvg--ESpOzeabI9U