Qazaqstan ofıtserleri BUU departamentteri laýazymdaryna taǵaıyndalýy múmkin

NUR-SULTAN. QazAqparat - Elordada QR Qorǵanys mınıstri Nurlan Ermekbaev BUU Bas hatshysynyń eki orynbasarymen kezdesti, dep habarlaıdy QazAqparat tilshisi.

Atap aıtqanda, mınıstr BUU Bas hatshysynyń jedel qoldaý jónindegi orynbasary Atýl Hare jáne bitimgershilik operatsııalar baǵytyndaǵy orynbasary Jan-Per Lakrýamen pikir almasty.

Kezdesý bitimgershilik úshin tehnologııalardaǵy seriktestik boıynsha besinshi halyqaralyq sımpozıým aıasynda ótti. Shara barysynda QR QK áskerı qyzmetshileriniń, onyń ishinde bitimgershi áıelderdiń BUU mıssııalaryna qatysý máseleleri talqylandy.

Odan basqa, «Aqyldy mindettemeler» aıasynda bitimgershilik operatsııalarǵa qazaqstandyq Qarýly Kúshterdiń qatysýyn ártaraptandyrý máselesi talqylandy. Bul turǵyda Qazaqstan jaqyn arada BUU bitimgershilik áleýetiniń ázirligi júıesinde mamandandyrylǵan bitimgershilik bólimshelerdi usynýǵa nıetti.

Sondaı-aq ulttyq bitimgershilik bastamalardy ilgeriletý jáne QR Qarýly Kúshteriniń ofıtserlerin bitimgershilik operatsııalar men operatsııalyq qoldaý jónindegi BUU-nyń departamentterinde bos laýazymdarǵa taǵaıyndaý múmkindigi máselesi talqylandy.