Qazaqstan oblystarynyń aýyl sharýashylyq óndirýshileri elordalyq naryqtan saýda oryndaryn alady (FOTO)

ASTANA. QazAqparat - Aýyl sharýashylyq taýar óndirýshileri Astanada óz ónimderin deldaldarsyz satatyn boldy. Búgin «QazAgro» ulttyq holdıngi men «Astana» ÁKK» UK arasynda yntymaqtastyq jine ózara túsinistik týraly memorandýmǵa qol qoıyldy. Qujat Qazaqstannyń barlyq oblystarynan aýyl sharýashylyq ónimderin naryqqa esh kedergisiz jetkizýge múmkindik beredi, dep habarlaıdy ákimdiktiń baspasóz qyzmetinen.

«QazAgro»-men birlesip memorandýmǵa qol qoıdyq, olar Qazaqstandaǵy barlyq óndirýshilerdiń naryqta alar ornyn, saýdaǵa shyǵýyn habarlap otyrady. Biz otandyq óndirýshilerdi naryqqa shyǵarýǵa tyrysyp júrmiz, osylaısha naryqtyq baǵanyń tómendeýine áser etemi, - dedi «Astana» ÁKK» UK» AQ Basqarma tóraǵasy Arman Ramazanov.

Taraptar otandyq óndirýshilerdiń ónimderiniń elordalyq naryqqa týra jetkizilýin qadaǵalaıdy, sondaı-aq Qazaqstannyń agroónerkásiptik salasynda júzege asyrylatyn jobaǵa ınvestıtsııa tartýǵa kúsh salady.

Memorandým aıasynda «Astana» ÁKK» UK «Shapaǵat» kommýnaldyq naryǵynda oryndardy aýyl sharýashylyq taýar óndirýshilerge jalǵa beretin bolady.

Aıta keteıik, qazirgi tańda Astanada azyq-túlik baǵasyn turaqtandyrý maqsatynda taýar óndirýshileriniń qatysýymen ár apta saıyn aýyl sharýashylyq jármeńkesi uıymdastyrylyp keledi. Kelesi aptada, 12-13 qyrkúıekte Jambyl oblysynyń taýar óndirýshileri «Mega» SOO aldyndaǵy alańda, al Ońtústik Qazaqstan oblysynyń taýar óndirýshileri Turan dańǵylyndaǵy «Astanalyq» saıabaqta jármeńke ótkizedi.