Qazaqstan nelikten +7 telefon kodynda qalady
TsDIAÓM Qazaqstan men Reseı Úkimetteri arasynda dúnıejúzilik nómirleýdiń 7-shi aımaǵyn birlesip paıdalaný týraly kelisimge qol qoıý týraly Úkimet qaýlysyn daıyndaǵan.
Qazirgi ýaqytta eki eldiń baılanys vedomstvolary arasynda kelisim jasalǵan.
2021 jyly Qazaqstanǵa jeke kod alý maqsatynda halyqaralyq telefon kody +997 rezervke qoıyldy.
Baılanys operatorlarymen jańa kodqa kóshý máselesin talqylaý barysynda jańa kodqa kóshý múmkin ekeni, alaıda birqatar qarjylyq jáne tehnologııalyq problemalar týyndaıtyny belgili boldy.
Sonymen qatar, otandyq baılanys operatorlarynyń búkil abonentteri memlekettik jáne bank qyzmetterin, áleýmettik jeliler men túrli qosymshalardy alý úshin óz derekterin jańartýy qajet bolady.
Osyǵan baılanysty kóshý kezeńinde aqaýlar men jaǵymsyz tájirıbeniń yqtımaldyǵy joǵary.
«Osyǵan baılanysty azamattardyń yńǵaılylyǵy úshin Tsıfrlyq damý, ınnovatsııalar jáne aeroǵarysh ónerkásibi mınıstrligi Halyqaralyq elektr baılanysy odaǵymen qaıta kelissóz júrgizip, +7 halyqaralyq kodyn ózgerissiz qaldyrý jóninde sheshim qabyldandy. Reseı Federatsııasy Úkimeti men Qazaqstan Respýblıkasy Úkimeti arasynda dúnıejúzilik nómirleýdiń 7-shi aımaǵyn paıdalaný týraly jańa Kelisimge qol qoıý máselesin Reseı Federatsııasynyń Tsıfrlyq damý, baılanys jáne buqaralyq kommýnıkatsııalar mınıstrligi qarady» deıdi mınıstrlikten.
Qazirgi ýaqytta jobany maquldaý jónindegi Reseı Federatsııasynyń notasy kútilip otyr.
Aıta keteıik, osydan úsh jyl buryn sol kezdegi mınıstr Baǵdat Mýsın Qazaqstannyń +997 telefon kodyna ótkeli jatqanyn jetkizgen edi.
Ol elimizge +997 nómirin BUU bergenin jáne ol kodtyń Qazaqstan úshin nelikten suralǵanyn túsindirdi.
Degenmen byltyr qarashada Qazaqstan +997 kodynan bas tartty.
Sonymen qatar Qazaqstan +77 kodyn ózine alý úshin tıisti vedomstvolarmen kelissóz de júrgizgen bolatyn.