Qazaqstan NCOC-den $150 mlrd ótemaqy talap etip otyr ma – Energetıka mınıstrliginiń jaýaby

<p>ASTANA. KAZINFORM &ndash; Energetıka mınıstriniń keńesshisi Shyńǵys Іlııasov &laquo;Qazaqstan Qashaǵan kenin ıgerip jatqan munaı kompanııalaryna qarsy ótemaqy somasyn 150 mlrd dollarǵa deıin kóterdi&raquo; delingen aqparatqa pikir bildirdi.</p>

Buǵan deıin Bloomberg basylymy Qashaǵan ken ornyn ıgerip jatqan halyqaralyq munaı alpaýyttaryna qarsy tórelik talap qoıý somasyn 150 mlrd dollarǵa (67,3 trln teńge) deıin arttyrǵanyn, shyǵyndar boıynsha daýǵa qosymsha alynbaı qalǵan paıda úshin ótemaqy talap etkendigin jazǵan bolatyn.

Ótken jyldyń kókteminde Qazaqstan Úkimeti eldiń batysynda munaı-gaz ken oryndaryn ıgerip jatqan North Caspian Operating Company N.V. jáne Karachaganak Petroleum Operating BV operatorlaryn halyqaralyq sotqa berdi. Memleket kompanııalardy tender tártibin buzdy, Qashaǵandaǵy merdiger mindettemesin tolyq oryndaǵan joq dep aıyptady. Bloomberg agenttigi 5 sáýirde Qazaqstan bıligi seriktesteriniń Qashaǵan boıynsha 13 mlrd, Qarashyǵanaq boıynsha 3,5 mlrd dollar shyǵyndy ustap qalǵanyna narazy bolyp otyrǵanyn atap kórsetti.

Atalǵan daýǵa qatysty Energetıka mınıstrligi pikir bildirdi.

«NCOC konsortsıýmymen tórelik talap qoıý týraly jarııalanǵan aqparatqa qatysty Qazaqstan Energetıka mınıstrligi mynany habarlaıdy: Soltústik Kaspıı jobasy boıynsha Ónimdi bólý týraly kelisim erejeleriniń sharttaryna sáıkes tórelik daýlardyń, talap-aryzdardyń egjeı-tegjeıi jarııa etilmeıdi. Bul - taraptar tórelik rásimder aıasynda sheshýge nıetti erekshe kommertsııalyq daý», - dedi Shyńǵys Іlııasov. 

2023 jyldyń sáýirinde Energetıka mınıstri Almasadam Sátqalıev Qarashyǵanaq jáne Qashaǵan ken oryndarynyń operatorlaryna qarsy sotqa shaǵym berilgenin, ol Qazaqstan halqynyń múddesin qorǵaý maqsatynda túsirilgenin atap ótken edi. 

«Somalar 3,5 mlrd dollardy jáne 13 mlrd dollardy quraıdy», - dep túsindirgen bolatyn Almasadam Sátqalıev.

Esterińizge sala ketsek, osy jyldyń naýryzynda Kaspıı teńizindegi «Qashaǵannan» munaı óndiretin NCOC kompanııasyna salynǵan 12 mlrd 419 mln teńge aıyppul óndirilgen bolatyn. 

Ekologııalyq retteý jáne baqylaý komıetiniń málimetinshe, 2022 jyly ekologııalyq ınspektsııa «North Caspian Operating Company» (NCOC) kompanııasynyń teńiz keshenine tekserý júrgizilgen. Onyń nátıjesimen ekologııalyq talaptardyń normalaryn buzý, onyń ishinde ekologııalyq ruqsatsyz kúkirtti gazdy jaǵý, óndiristik sýlardy Kaspıı teńizine tazartýsyz aǵyzý faktileri anyqtalyp, 5 ákimshilik is qozǵalǵan.