Qazaqstan naryǵynda yntymaqtastyq úshin mol áleýet bar - AQSh Saýda mınıstri

ASTANA. QazAqparat - Búginde Qazaqstanda 150-den astam AQSh kompanııasy jumys istep jatyr. Bul týraly búgin elordada ótip jatqan qazaqstandyq-amerıkalyq bıznes forým barysynda AQSh Saýda mınıstri Ýılbýr Ross aıtty, dep habarlaıdy QazAqparat tilshisi.

«Qazirgi ýaqytta Qazaqstanda Amerıkanyń 150-den astam kompanııasy jumys isteıdi jáne ınvestıtsııa kólemi shamamen 26 mlrd dollardan asyp jyǵylady. Eger biz olarǵa durys jaǵdaı jasaı alsaq, onda bul tsıfr aıtarlyqtaı arta túsýi múmkin», - dedi ol.

Sonymen qatar, AQSh Saýda mınıstri Qazaqstannyń bıznes júrgizýdi jeńildetýge baǵyttalǵan oń sharalar qabyldap jatqanyn jáne bul salada úlken progreske qol jetkize alatynyn basa aıtty.

«Amerıkalyq kompanııa ókilderi Qazaqstanǵa jańa saýda yntymaqtastyǵy men iskerlik baılanystar úshin qandaı múmkinshilikter bar ekenin kórýge kelip otyr. Delegatsııa quramyndaǵy kásipkerlerdiń kóptigi ulǵaıyp kele jatqan qazaqstandyq naryqtyń zor áleýeti bar ekenin bildiredi», - dedi Ýılbýr Ross.

Aıta keteıik, forým jumysyna QR Premer-Mınıstriniń birinshi orynbasary Asqar Mamın, 20-dan astam amerıkalyq kompanııa basshysy, qazaqstandyq bıznes ókilderi, mınıstrlikter men vedomstvolardyń basshylary qatysty.

Shara aıasynda aýyl sharýashylyǵy, ınfraqurylym, avıaqurylys, tsıfrlandyrý jáne aqparattyq tehnologııalar salalaryn qamtıtyn 8 ekijaqty qujatqa qol qoıyldy.

Esterińizge sala ketsek, AQSh-tyń Saýda mınıstri Ýılbýr Ross elimizge sapary aıasynda Elbasy Nursultan Nazarbaevpen kezdesip, sonymen birge QR Premer-Mınıstri Baqytjan Saǵyntaevpen ekonomıkalyq yntymaqtastyq máselelerin talqylady.