Qazaqstan naryǵynda Shveıtsarııadan neshe ınvestor jumys istep jatyr

ASTANA. QazAqparat – Qazaqstan Shveıtsarııanyń Ortalyq Azııadaǵy eń mańyzdy seriktesi sanalady. Bul týraly memlekettik Hatshylyqtyń (Shveıtsarııa) ekonomıkalyq máseleler jónindegi syrtqy ekonomıkalyq baılanystar basqarmasynyń (SECO) basshysy Ivo German aıtty, dep habarlaıdy QazAqparat tilshisi.

«Ekonomıka salasynda bizdiń qarym-qatynasymyz óte jaqsy. Qazaqstan – Shveıtsarııanyń Ortalyq Azııadaǵy eń mańyzdy ekonomıkalyq seriktesi, al Shveıtsarııa úshinshi iri ınvestor sanalady. Ulttyq banktiń málimetine qaraǵanda, Qazaqstan naryǵynda Shveıtsarııadan 40 ınvestor belsendi jumys istep jatyr», - dedi Ivo German Astana halyqaralyq forýmynda.

Sonymen qatar ol Qazaqstandaǵy reformaǵa qatysty pikir bildirdi.

«Eger biz kedergilerdi eńsere alsaq, onda ekonomıkalyq qatynastardaǵy áleýetimizdi nyǵaıta túsemiz. Qazaqstan Úkimeti 2022 jyly bastaǵan reformalar baǵdarlamasy bul baǵytta jaqsy nátıjege alyp keledi dep sanaımyz. Ondaǵy negizgi elementter qazirdiń ózinde ósimdi baıqatyp otyr. Bul turǵyda Shveıtsarııa bıznesi men basqa da kásipkerler úshin ekonomıkany ártaraptandyrý, shaǵyn jáne orta bıznesti damytý, tsıfrlandyrý, zań ústemdigin nyǵaıtý, sondaı-aq adamı kapıtaldy damytý negizgi element sanalady. Buǵan shveıtsarııalyq kompanııalar nazar aýdaryp otyr. Sondyqtan iske qosylyp jatqan jańa qadamdar Qazaqstandaǵy naryqty tartymdy ete túsedi», - dedi Ivo German.

Budan buryn habarlanǵandaı, búgin elordadaǵy Kongress ortalyqta Astana halyqaralyq forýmy jumysyn bastady.

Forým klımattyń ózgerýine, azyq-túlik tapshylyǵyna jáne energetıkalyq qaýipsizdikke qatysty máselelerdi sheshý joldaryn qarastyrý maqsatynda shetel úkimetteriniń, halyqaralyq uıymdardyń, bıznes pen ǵylymı ortanyń joǵary laýazymdy delegattarynyń dıalogine arnalǵan alań bolmaq.