Qazaqstan naryǵynda qaýipti kámpıtter anyqtaldy

PAVLODAR. QazAqparat - «Densaýlyq» ulttyq qaýymdastyǵy, Tutynýshylar ulttyq lıgasy jáne «Report Kontrafakt» kommertsııalyq jobasy qazaqstandyq naryqta kontrafaktili ónimderdiń bar-joǵyn tekserdi. Nátıjesinde áıgili brendterdiń ataýynda bir árip ózgertilip, kontrafaktili kámpıtter satylyp jatqany anyqtaldy, dep habarlaıdy QazAqparat Pavlodarnews.kz-ke silteme jasap.

Atap aıtqanda, qaýipti táttiler Pavlodardaǵy «Asyl» bazarynda jáne «Olja» saýda úıinde satylyp kelgen.

Sarapshylar zerthanaǵa Fiberello kámpıtteriniń úlgilerin tapsyryp, nátıjesinde olardyń quramynda kolıforma — ishek taıaqshalary jáne ruqsat etilgen mólsherden asyp ketken ashytqylar anyqtaldy. Bul ónimdi óndirý jáne saqtaý erejeleriniń buzylǵanyn kórsetedi. Ashytqy mólsheri normadan joǵary bolǵandyqtan aǵzada ýly zattar jınalyp, dısbakterıozǵa, asqazan-ishek joldarynyń buzylýyna jáne metabolızmge alyp keledi.

«Jalǵan ónim shyǵarý aıtqysyz aýqymǵa jetti. Naryqqa analız jasaý kezinde anyqtalǵan barlyq kontrafaktili ónimderdiń shyǵý tegi belgisiz», — dedi Ulttyq tutynýshylar lıgasynyń prezıdenti Svetlana Romanovskaıa.

Onymen qosa, taýarlar tańbalaý talaptaryna sáıkes kelmegen: qaptamalarda óndirýshi týraly aqparat, ónim quramynyń sıpattamasy bolmady.

Málim etilgendeı, jalǵan kámpıtterdiń qaptamasynda kóbine Ózbekstandaǵy óndirýshi kompanııalardyń mekenjaıy kórsetilgen. Biraq ondaı mekenjaılar boıynsha óndiris orny bolmaı shyqty. ıAǵnı, táttiler zańsyz jolmen jasalǵan.

Svetlana Romanovskaıanyń aıtýynsha, tanymal brendterge uqsatylyp jasalǵan kámpıtter — salada baqylaýdyń tolyq bolmaýynyń dáleli. Kontrafaktiniń naryqqa túsýin anyqtaýmen eshkim aınalyspaıdy.

«Basty sebepterdiń biri — bıznesti tekserýge jarııalanǵan moratorıı. Bul tyıym adal óndirýshiler men zań buzýshylardy ádiletsiz jaǵdaılarǵa dýshar etedi», — dedi uıym basshysy.

Qazaqstannyń Ulttyq kásipkerler palatasynyń málimetinshe, 2018 jyldan 2021 jylǵa deıin elge 30 mıllıard teńgege kontrafaktili ónim ákelingen. Bul kólem jyl saıyn 10 paıyzǵa artyp otyr.