Qazaqstan Nıý-Iorkte BUU Qaýipsizdik Keńesiniń jańa músheleriniń týlaryn ornatý rásimin ótkizdi
Bul týraly QazAqparat QR Syrtqy ister mınıstrliginiń Telegram kanalyna silteme jasap habarlaıdy.
BUU QK zalynyń aldynda ózderiniń ulttyq jalaýlaryn Úndistannyń, Irlandııanyń, Kenııanyń, Meksıkanyń jáne Norvegııanyń turaqty ókilderi ornatty.
Qaýipsizdik Keńesiniń jańa jyldaǵy jumysynyń alǵashqy kúninde rásimdi ótkizý dástúri Qazaqstan - 2018 jyldyń qańtarynda dúnıejúzilik uıymnyń osy ortalyq organyna tóraǵalyq etý kezinde negizi qalanǵan bolatyn.
Rásimdi asha otyryp, Qazaqstannyń BUU janyndaǵy Turaqty ókili Maǵjan Іlııasov ótken jyl álemniń barlyq elderi úshin qıyn bolǵanyn atap ótti. 2021 jyly turaqty damý, beıbitshilik pen qaýipsizdik kóbine BUU men onyń Qaýipsizdik Keńesiniń sheshimderine baılanysty bolatyndyǵyn basa aıtyp, ol 2020 jyly alǵan sabaqtardy taldaýǵa jáne yntymaqtastyqtyń, ymyraǵa kelýdiń jáne jahandyq beıbitshilikke beıildiliginiń úlgilerin bolashaq jumysymyzda qoldanýǵa shaqyrdy.
«Jańa jyl bárimiz úshin jáne bizdiń dúnıejúzilik uıymymyz úshin úmit jyly bolady. Bizdiń úmitterimizdi barlyq adamdar úshin shynaıy ıgilikterge jáne oń ózgeristerge aınaldyrý úshin naqty is-qımyl qajet», - dedi elshi Qaýipsizdik Keńesiniń saılanǵan múshelerine arnaǵan sózinde.
Ol jınalǵandarǵa BUU-nyń negizgi organdarynyń birinde belgilengen jumys josparlaryn júzege asyrýda sáttilik tiledi.
Qazaqstannyń Turaqty ókili sonymen qatar koronavırýs pandemııasyna qarsy kúrestegi erlikke adaldyǵy úshin búkil álemdegi medıtsına qyzmetkerlerine, sondaı-aq ǵalymdar men zertteýshilerge COVID-19-ǵa qarsy vaktsına jasaý jónindegi kúsh-jigeri úshin rızashylyǵyn bildirdi.
Qaýipsizdik Keńesiniń tóraǵasy, Týnıstiń BUU janyndaǵy turaqty ókili Tarek Ladeb Qazaqstanǵa is-sharany uıymdastyrǵany úshin alǵys aıtty.
Onyń aıtýynsha, pandemııa jaǵdaıyndaǵy jumystyń kúrdelene túskenine qaramastan, bul rásim Qaýipsizdik Keńesiniń jańa turaqty emes múshelerine saltanatty jaǵdaıda jahandyq beıbitshilik pen qaýipsizdikti saqtaý boıynsha óz mandattaryn oryndaýdy bastaýǵa múmkindik berdi.
Óz kezeginde Úndistannyń, Irlandııanyń, Kenııanyń, Meksıkanyń jáne Norvegııanyń turaqty ókilderi 2021-2022 jyldarǵa arnalǵan Keńestegi jumysynyń basymdyqtary týraly sóz sóıledi.
Qazaqstannyń bastamasynan buryn Qaýipsizdik Keńesiniń zaly aldynda BUU Qaýipsizdik Keńesi turaqty emes músheleriniń týlaryn aýystyrýy tehnıkalyq rásimi boldy. Jańa dástúrdi engizýimen bul rásim buqaralyq aqparat quraldary ókilderiniń qatysýymen Keńestiń jyl saıynǵy baǵdarlamasynyń birinshi jumys kúnindegi resmı is-sharaǵa aınaldy.
2019 jyly qańtarda Qazaqstannyń Turaqty ókildigi BUU Qaýipsizdik Keńesi músheleriniń týlary úshin Qazaqstanda jasalǵan jáne qazaq ulttyq oıýlarmen bezendirilgen arnaıy tuǵyrlar syılady.