Qazaqstan N-145M áskerı tikushaqtaryn qurastyrady

NUR-SULTAN. QazAqparat - Qazaqstan N-145M áskerı tikushaqtaryn shyǵarýdy josparlap otyr. Bul týraly qarýlaný salasyndaǵy yntymaqtastyq jónindegi Qazaqstan-Frantsııa komıssııasynyń VIII otyrysynda aıtyldy, dep habarlaıdy QazAqparat.

QR Tsıfrlyq damý, qorǵanys jáne aeroǵarysh ónerkásibi mınıstrliginiń baspasóz qyzmetinen málim etkendeı, áskerı tikushaqtar «Eýrokopter Qazaqstan ınjınırıng» JShS bazasynda shyǵarylady. Buǵan deıin Qazaqstanda, tipti Ortalyq Azııa elderinde áskerı tikushaq shyǵarylǵan emes.

Otyrysta QR Qarýly Kúshteri jáne úshinshi elder úshin de qarý men áskerı tehnıkanyń perspektıvaly túrlerin óndirýge tehnologııalar transferti men ınvestıtsııalardy arttyrýǵa basty nazar aýdaryldy.

QR Tsıfrlyq damý, qorǵanys jáne aeroǵarysh ónerkásibi birinshi vıtse-mınıstri Talǵat Janjúmenovtiń tóraǵalyǵymen ótken komıssııa jumysyna Qazaqstannyń memlekettik organdary jáne qorǵanys salasyndaǵy kásiporyndarynyń ókilderi, Frantsııanyń Nexter, Safran, Thales, Airbus syndy onnan astam qorǵanys kásiporyndarynyń ókilderi qatysty. Frantsýz delegatsııasyn Frantsııa Qarýly kúshteri mınıstrliginiń ókili, qarýlaný general-ınjeneri Toma Lern bastap keldi.

Eki kúnge sozylǵan jumystyń nátıjesinde Safran kompanııasymen Reseı jáne Eýropa tikushaqtary úshin sholý júıelerin qurastyrý, SÝ-30SM tikushaqtaryna arnalǵan avıatsııalyq elektronıkalar óndirisin uıymdastyrý jáne olarǵa servıs qyzmetterin kórsetý týraly kelisimderge qol jetkizildi.

Taraptar áskerı-tehnıkalyq saladaǵy ózara tıimdi yntymaqtastyqty odan ári keńeıtýge, ózara ınvestıtsııalardy tartýǵa kelisip, hattamaǵa qol qoıdy.

«Eýrokopter Qazaqstan ınjınırıng» JShS - Qazaqstan Respýblıkasy Prezıdentiniń tapsyrmasymen 2011 jyly qurylǵan birlesken kásiporyn. Tikushaqtardy qurastyrý jobasy parıtettik negizde iske asyrylady: onyń basynda «Qazaqstan ınjınırıng» Ulttyq kompanııasy» AQ men «Airbus Helicopters» zaýyty tur. Birlesken kásiporynnyń maqsaty - óńir elderiniń tikushaq tehnıkasyna degen suranysyn qamtamasyz etý.