Qazaqstan musylman elderine azyq-túlik eksportyn ulǵaıtýǵa ázir

ASTANA. QazAqparat - IYU elderi agrarlyq ǵylymdy damytyp, jańa tehnologııalardy engizýi qajet. Bul týraly búgin Islam yntymaqtastyq uıymynyń ǵylym jáne tehnologııalar jónindegi sammıtinde Elbasy Nursultan Nazarbaev málim etti, dep habarlaıdy QazAqparat.

«Jasyl» tehnologııalardy damytý salasyndaǵy yntymaqtastyq úshin «Jasyl» tehnologııalar men ınvestıtsııalar jónindegi halyqaralyq ortalyqtyń múmkindigin paıdalanǵan jón. Atalǵan ortalyq úsh aı boıy álem nazaryn elimizge aýdarǵan EKSPO-2017 kórmesiniń bazasynda qurylatyn bolady. EKSPO-2017 halyqaralyq kórmesi elordamyzda «Bolashaq energııasy» degen taqyryppen ótkenin bilesizder. Oǵan dúnıejúziniń 115 memleketi men 22 halyqaralyq uıymy atsalysty. Olardyń arasynda sizderdiń de elderińiz bar. EKSPO kórmesinde energetıka salasyndaǵy jańa ıdeıalar, zertteýler men tehnologııalar kórinis tapty. Sammıtimizdiń osy kóreminiń aıasynda ótýiniń sımvoldyq máni bar dep bilemin», - dedi Prezıdent.
 

Budan bólek, N. Nazarbaev IYU elderi úshin agrarlyq salada yntymaqtastyq asa mańyzdy ekenin atap ótti.

«Bárimiz birlesip agrarlyq ǵylymdy damytyp, jańa tehnologııalardy engizýimiz qajet. Bul tek aýyl sharýashylyǵynyń básekege qabilettigin arttyrý emes, budan da tyǵyz ıntegratsııa men azyq-túlik qaýipsizdigin qamtamasyz etý úshin qajet. Islam yntymaqtastyǵy uıymyna múshe memleketterdiń Azyq-túlik qaýipsizdigi jónindegi Islam uıymynyń jumysyn belsendi qoldaıtyndaryńyzǵa senimdimin. Qazaqstan óz tarapynan azyq-túlikti kóbeıtýge, ıslam elderine ónimdi shyǵarýǵa barlyq jaǵdaıy men múmkinshilikteri bar. Bul uıymynyń shtab-páteri jaqynda Astana qalasynda óz jumysyn bastaıtyn bolady», - dedi Memleket basshysy