Qazaqstan muraǵatshylary 28 panfılovshylar erliginiń jalǵan emestigin dáleldep shyqty
«Biz 28 Panfılovshylar boıynsha bolǵan úlken daýda dıvızııanyń namysyn qorǵap shyqtyq. Barlyq qujat-dálelderimizdi kórsetip shyqtyq. 1941 jyldyń 16 qarashasynda polıtjetekshimen birge bizdiń Málik Ǵabdýllın turǵanyn da kórdik. Sol qujattardy da taptyq. 7 myń qazaq Máskeý túbinde keýdelerin oqqa tosqan. 28 emes, 7 myń qazaq! Ol qujattarymyz qolymyzda bar, reseılikter ony moıyndady. Jalpy materıaldarymyzdy biz jarııalaıtyn bolamyz. Reseılikter 7 birdeı atqyshtar dıvızııasy turǵanyna kózderi jetti. Osy isti bizdiń ulttyq muraǵatshylarymyz ózderiniń qajyrly eńbekteriniń arqasynda abyroımen atqaryp shyqty», - deıdi ol.
Aıta keteıik, osydan biraz ýaqyt buryn Reseı Memlekettik muraǵatynyń dırektory Sergeı Mıronenko Dýbosekovo túbinde 28 panfılovshynyń nemistiń 50 tankisiniń jolyn keskendigi jaıly erligin joqqa shyǵarǵan edi. Sonymen qatar ol saıası jetekshi Vasılıı Klochkovtyń «Sheginer jer joq, Artymyzda Máskeý!» degen sóziniń de oıdan shyǵarylǵandyǵyn aıtqan bolatyn. Onyń sózine qaraǵanda, bul qanatty sózdi «Krasnaıa Zveda» gazetiniń ádebı hatshysy Aleksandr Krıvıtskıı oıdan shyǵarǵan. Dál osy jýrnalıst 28 panfılovshylar erligin jazǵan edi.