Qazaqstan munaıynyń 55 paıyzy Atyraýda óndiriledi - telekópir
«Qazirgi kezde Atyraý – Qazaqstannyń eń iri ındýstrııalyq ortalyǵyna aınaldy. Elde shyǵarylatyn munaıdyń 55 paıyzy Atyraýda óndiriledi. Máselen, oblysta 2020 jyldyń 7 aıynda 28,5 mln. tonna munaı men 14,7 mlrd. tekshe metr gaz óndirildi» degen aımaq basshysy otandyq ekonomıkada munaıdyń mańyzy joǵary ekenin atap ótti.
Oblys ákiminiń pikirinshe, arnaýly ekonomıkalyq aımaq aýmaǵynda gaz-hımııa kesheniniń salynýy – shaǵyn jáne orta bıznestiń damýyna múmkindik beredi.
«6,5 mlrd. AQSh dollaryna baǵalanǵan jobanyń birinshi fazasy 2021 jyly iske qosylady. Aımaqta iri jobalardyń júzege asyp, óńirdegi ónerkásiptiń damýy bilikti mamandarǵa degen suranysty arttyrdy. Sondyqtan, munaıshylar ustahanasyna aınalǵan Atyraý munaı jáne gaz ýnıversıteti úshin de ozyq tehnologııaǵa jetik jáne básekege qabiletti kadrlar daıyndaý talaby artyp otyr», dedi oblys ákimi Mahambet Dosmuhambetov.
Sondaı-aq aımaq basshysy munaıshylardy kele jatqan munaı-gaz kesheni qyzmetkerleri kúnimen quttyqtady.
«Qara altynda óndirýde alǵashqy kúnnen bastap ár jyldary tabysty eńbek etken munaıshylarymyzdy árqashan maqtanyshpen eske alamyz. Іrgeli isterdi jalǵastyryp, eldiń kórkeıýine súbeli úles qosyp júrgen qazirgi munaıshylardyń da eren eńbekterin atap ótkim keledi», degen ol munaıshylardyń egemen elimizdiń jarqyn bolashaǵy úshin jasap jatqan tolaıym jumystaryna tabys tiledi.
Safı Ótebaev atyndaǵy Atyraý munaı jáne gaz ýnıversıtetinde telekópir formatynda ótken jıyn barysynda QR Energetıka vıtse-mınıstri Janat Jahmetova, Batys Qazaqstan oblysynyń ákimi Ǵalı Esqalıev , «KazNIGRI» JShS dırektory, Indýstrıaldy komıtet tóraǵasynyń orynbasary Asqar Munara quttyqtaý lebizderin joldady.
Eske sala ketelik, búgingi tańda oblysta 25 munaı-gaz óndirýshi jáne 100-den astam munaı-gaz servıstik kompanııalary qyzmet atqaryp jatyr. Munaı salasynda 130 myńǵa jýyq adam jumys isteıdi.