Qazaqstan munaıyn Ázerbaıjan arqyly tasymaldaý qaıta jandandy

ASTANA. QazAqparat - Qazaqstan Ázerbaıjan arqyly munaı eksporttaýdy qaıta jandandyrdy, dep habarlaıdy «QazAqparat» HAA tilshisi.

Bul týraly QR Energetıka mınıstrligi «QazAqparat» HAA saýalyna jaýap berý barysynda málim etti.

Mekeme derekterine sáıkes, 2017 jyldyń basynan beri Baký - Tbılısı - Jeıhan munaı qubyrymen 90 myń tonna qazaqstandyq munaı eksporttalǵan. Al ótken jyly Batýmı munaı termınaly arqyly qazaqstandyq munaı men munaı ónimderi tasymaldanbaǵan.

 «Batýmı munaı termınaly arqyly ári qaraı ónim tasymaldaý úshin «QazTransOıl» AQ turaqty negizde kóliktik dálizdiń barlyq qatysýshylarymen, sonyń ishinde Ázerbaıjanmen jáne yqtımal júk jiberýshilermen sáıkes jumystar júrgizedi,.

Sondaı-aq, Energetıka mınıstrligi Aqtaý portyn jekeshelendirýge qatysty pikir bildirdi.

«Aqtaý portyn jekeshelendirýdiń qazaqstandyq munaıdy Ázerbaıjan arqyly tasymaldaýǵa esh yqpaly tımeıdi», - dep atap ótti mınıstrlik ókilderi.

Eske sala ketsek, 2015 jylǵa deıin Qazaqstan óz munaıyn Baký - Tbılısı - Jeıhan munaı qubyrymen jáne temir jol arqyly Bakýden Grýzııanyń qarateńizdik porttaryna deıin tasymaldaǵan edi.