Qazaqstan munaıy Djeıhannan Rýmynııa baǵytyna jóneltile bastady

ASTANA. QazAqparat - «QazMunaıGaz» UK AQ Basqarma Tóraǵasy Maǵzum Myrzaǵalıev Túrkııanyń Djeıhan portyna baryp, «QazMunaıGazǵa» tıesili Rýmynııada ornalasqan «PETROMIDIA» munaı óńdeý zaýytyna Qazaqstan munaıyn jóneltý barysymen tanysty, dep habarlaıdy atalǵan kompanııanyń baspasóz qyzmeti.

«Búgin biz otandyq munaı-gaz salasy úshin aıtýly oqıǵanyń kýágeri bolyp otyrmyz. Memleket basshysynyń Qazaqstan munaı tasymalynyń jańa baǵyttaryn damytýǵa erekshe kóńil bóletini kezdeısoq emes. Bul turǵyda ázerbaıjandyq SOCAR kompanııasymen jasalǵan kelisimniń is júzinde oryndalyp jatqany qýantady. Bul ózara yntymaqtastyǵymyzdy odan ári damytýdyń áleýeti zor ekendigin rastap otyr», - dedi jóneltýdi bastaý rásimi kezinde M.Myrzaǵalıev.

Sonymen qatar QMG basshysy is-sharaǵa qatysqan «Teńizshevroıl» kompanııasynyń basshylyǵyna Baký–Tbılısı–Djeıhan munaı qubyry arqyly tasymaldaý sharttary boıynsha tabysty júrgizilgen kelissózder serııasy úshin alǵysyn bildirdi.

Djeıhan termınalynan kólemi 80 myń tonna munaıdyń alǵashqy partııasyn «Qazaqteńizkólikfloty» UTKQK JShS-ne (QMG-niń enshiles uıymy) tıesili otandyq «ALATAU» tankeri tasymaldaıtynyn atap ótken jón. Ol munaı Rýmynııanyń Konstantsa porty baǵytyna jóneltilip, «Petromidia» munaı óńdeý zaýytyna túsiriledi.

Aqtaý – Baký – Djeıhan marshrýty boıynsha jyl saıyn 1,5 mln tonna kóleminde munaı tranzıti týraly bes jyldyq kelisimge «QazMunaıGaz» UK AQ pen Ázerbaıjannyń SOCAR kompanııasy ótken jyldyń sońynda qol qoıdy. Bıyl naýryz aıynda Qazaqstan munaıy Aqtaý – Baký baǵyty boıynsha jóneltile bastady. Tasymaldaýǵa qazaqstandyq jáne ázerbaıjandyq flottar parıtettik negizde jumyldyryldy. 20 sáýirdegi jaǵdaı boıynsha Aqtaý portynan 86 myń tonna munaı jóneltildi.