Qazaqstan munaıdy esepke alýdyń aqparattyq júıesin engizbek

ASTANA. QazAqparat - QR Energetıka mınıstrligi qylmystyq joldarǵa tosqaýyl qoıý úshin munaıdy esepke alýdyń aqparattyq júıesin engizbek. Bul týraly atalǵan vedomstvonyń alqa májilisinde mınıstr Qanat Bozymbaev málim etti, dep habarlaıdy QazAqparat.

«Sandyq tehnologııalardy paıdalaný salalarǵa jańa sapany engizýge múmkindik beredi. Osy oraıda málimetterdi avtomattandyrylǵan tártipte jınaý, óńdeý jáne paıdalaný úshin munaıdy esepke alýdyń aqparattyq júıesin engizý eskerilýde. Bul júıe munaıdy óndirýdiń, munaı aınalymy kezinde týyndaıtyn barlyq tehnıkalyq ysyraptardy eske alýdy jańǵyrtý men avtomattandyrýǵa jol ashady»,-dep toqtaldy mınıstr.

Onyń paıymynsha, bul jańashyldyq munaıdy óndirý men tasymal kezindegi túrli ysyrapty tómendetýi tıis, sondaı-aq osy baǵytta qandaıda da bir qylmystyq tizbekterdiń jolyn kesýge yqpal etedi.

Bozymbaevtyń sózinshe, 2017 jyly zańnamaǵa tıisti túzetýler ázirlenedi, al 2018-2019 jyldary júıe engizilip, 2020 jyldan bastap ol barlyq ken oryndaryn qamtıtyn bolady.