Qazaqstan munaı jáne gazhımııalyq ónimder eksportyn 2,5 mlrd. dollarǵa jetkizýdi josparlaýda - Á.Isekeshev

ASTANA. QazAqparat - Qazaqstan 2019 jylǵa qaraı munaı jáne gazhımııalyq ónimderdiń eksportyn 2,5 mlrd. AQSh dollaryna jetkizýdi josparlaýda. Bul týraly búgin VII Astana ekonomıkalyq forýmynda QR Premer-Mınıstriniń orynbasary - Indýstrııa jáne jańa tehnologııalar mınıstri Áset Isekeshev málim etti.

«Munaı jáne gazhımııa bizde jańa sala bolady. 2019 jyly bizde otandyq polıpropılen, polıetılen, polımerli ónimder jáne onyń eksporty 2,5 mlrd. AQSh dollaryna jetedi. Osylaısha nólden bastaǵan sala óńdeýshi salanyń 5 paıyz úlesin quraıtyn bolady», - dep atap ótti ol.

Ol sonymen qatar 2016-2017 jylǵa qaraı eldegi munaı óńdeýshi zaýyttardyń barlyǵy jańǵyrtylýdan ótip bitetindigin habarlady. Ol óz kezeginde jylyna 19 mln. tonna munaıdy óńdeýge múmkindik beredi jáne ishki naryqty joǵary sapaly eýro-4 pen eýro-5 janar-jaǵarmaılarymen qamtamasyz etýge sep bolady.