Qazaqstan munaı jáne gaz óndirýshi el retinde jańa geoekonomıkalyq jaǵdaıǵa beıimdelýi kerek

ASTANA. QazAqparat – Qazaqstan munaı jáne gaz óndirýshi el retinde jańa geoekonomıkalyq jaǵdaıǵa beıimdelýi kerek. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazaqstan munaı jáne gaz óndirýshi el retinde jańa geoekonomıkalyq jaǵdaıǵa beıimdelýi kerek. Ekonomıkany ártaraptandyrý – ýaqyt talaby ári strategııalyq mindet. Biz bul týraly únemi aıtyp júrmiz. Biraq isimizden sózimiz kóp bolyp tur. Dereý iske kóshpesek, álemdik básekede ozyq bola almaımyz, ıaǵnı álem ekonomıkasynda kósh sońynda qalýymyzǵa týra keledi. Jańa ǵana elimizdiń damý barysy týraly Úkimettiń esebin tyńdadyq», - dedi Qasym-Jomart Toqaev.