Qazaqstan munaı óndirýdi tómendetýde OPEK sheshimin qoldaýdy jalǵastyra beredi

ASTANA. QazAqparat - Qazaqstan munaı óndirýdi tómendetý boıynsha OPEK sheshimine qoldaýdy jalǵastyra beredi. Bul týraly búgin Aqordada otandyq jáne sheteldik jýrnalıstermen kezdesken Elbasy Nursultan Nazarbaev aıtty, dep habarlaıdy QazAqparat.

«Biz OPEK-tiń munaı óndirýdi tómendetý boıynsha ortaq pikirine qosyldyq. Qazaqstan óndiristi 20 myń barrelge tómendetti. Degenmen, Qashaǵan iske qosylǵannan keıin bul maqsatqa jetý bizge ońaıǵa túsken joq. Biraq biz pikirlestigimizdi bildirip otrymyz. Óıtkeni, bul baǵaǵa yqpal etedi. Munaıdyń ortasha baǵasy - barreline 52-55 dollar. Bul bizge de, barlyǵyna da qolaıly. Sebebi bizdiń bıýdjetimiz 40-45 dollarǵa eseptelgen. Eger bul pozıtsııa jumys isteıtin bolsa, onda biz munan ary da baǵa boıynsha osyndaı múmkinshilikti ustap turý úshin ózge de munaı óndirýshi eldermen pikirlestigimizdi qoldaımyz»,- dedi Elbasy.