Qazaqstan munaı óndirýdi táýligine 390 myń barrelge qysqartady

NUR-SULTAN. QazAqparat - Qazaqstan munaı óndirýdi táýligine 390 myń barrelge qysqartady. Memleket mundaı mindettemelerdi eki aı merzimge OPEK+ kelisimi aıasynda óz moınyna aldy, dep habarlaıdy QazAqparat QR Energetıka mınıstrliginiń baspasóz qyzmetin silteme jasap.

12 sáýirde OPEK+ kelisimine qatysýshy elderdiń mınıstrlikteriniń vebınary barysynda OPEK+ elderiniń, sondaı-aq OPEK+ quramyna kirmeıtin elderdiń munaı óndirýi táýligine 9,7 mln.barrelge ujymdyq qysqartý týraly kelisimde konsensýsqa qol jetkizildi. Bul álemdik munaı ındýstrııasy tarıhynda munaı óndirisin eń úlken ujymdyq qysqartýdyń biri. Qazaqstan óz kezeginde kelisimdegi konsensýsqa qoldaý kórsetip, táýligine 390 myń barrelge óndirýdi qysqartý mindetin óz moınyna aldy.

Mundaı sheshim birinshi kezekte munaı naryǵynda ǵana emes, búkil álemde qalyptasqan kúrdeli jaǵdaıdan týyndaıdy.

Koronavırýs pandemııasyna baılanysty barlyq elderde munaıǵa degen suranys kúrt tómendedi, sondyqtan OPEK hatshylyǵynyń óndirýdi ujymdyq qysqartý týraly usynysy oryndy jáne ýaqytyly sheshim bolyp sanalady.

Eger OPEK + mámilesi jasalmasa, munaı óndirýshi elder kez-kelgen jaǵdaıda óndiristi qysqartatyn edi. Óıtkeni naryqtyń barlyq oıynshylarynyń aldynda turǵan problema - saqtaý qoımalarynyń tolyp ketýi, sondaı-aq búgingi tańda álemde munaı kóp bolǵandyqtan, suranystyń bolmaýy.

OPEK + mámilesiniń arqasynda óndiristiń qysqarýy ujymdyq, baqylanatyn bolady jáne naryqqa oń serpin beredi. Bul sarapshylardyń pikirinshe, munaı baǵasynyń ósýine oń áser etedi, sondaı-aq qoımalardaǵy munaıdyń tolyp ketýi máselesin sheshedi.

Energetıka mınıstrligi qazirgi ýaqytta munaı óndirisin qysqartý stsenarııin ázirleýde.