Qazaqstan munaı óndirisin nelikten azaıtty - mınıstrdiń jaýaby

NUR-SULTAN. QazAqparat - Elimizde qańtar-shilde aılarynda 51,5 mln tonna munaı jáne kondensat óndirildi. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.

«2020 jyldyń qańtar-shilde aılarynyń qorytyndysy boıynsha munaı jáne kondensat óndirý kólemi 51,5 mln tonnany qurap, 2019 jyldyń sáıkes kezeńimen salystyrǵanda 1,4 paıyzǵa tómen boldy. Óndiris kólemi josparynyń oryndalmaý sebebi - koronavırýstyń taralýyn boldyrmaý maqsatynda kóptegen elderde karantın engizilýi», - dedi mınıstr.

Onyń túsindirýinshe, koronavırýs indetine baılanysty álemdik ekonomıkalyq belsendilik tómendep munaı jáne munaı ónimderiniń jahandyq usynysy tez artyp ketken.

«Balanstyń buzylýyna munaı men munaı ónimderiniń álemdik jınaqtarynyń qarqyndy ósýi de eleýli áser etti. Osyndaı qajettilikti qamtamasyz etýge munaı qoımalary kóleminiń jetispeýshiligi óndiristi toqtatý qaýpin týyndatty. Munaı qoımalarynyń tolyp ketýin boldyrmaý maqsatynda óndirýdi qysqartý jónindegi sharalar qabyldandy. Munaı eksporty 42 mln tonnany qurady. Bul 2019 jyldyń sáıkes kezeńimen salystyrǵanda - 104 paıyz», - dedi Nurlan Noǵaev.