Qazaqstan munaı-hımııa salasyndaǵy birqatar jobany qarastyrýda

<p>ASTANA. KAZINFORM &mdash; Qazaqstan munaı-hımııa salasynda quny 14 mlrd dollar bolatyn birqatar jobany qarastyryp jatyr. Bul týraly QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Memleket basshysy Qasym-Jomart Toqaev aıtty.</p>

«Halyqaralyq munaı kompanııalary eldiń damýynda basty ról atqardy. Olardyń Qazaqstanda bolýy ınvestıtsııalyq tartymdylyqtyń belgisi sanalady. Sheteldik ınvestorlar ınvestıtsııany kapıtal, ozyq tehnologııalar jáne joǵary bilikti jumys kúshi túrinde usynady. Investıtsııa bizdiń energetıka salamyzdyń ósýine yqpal etti. Sońǵy 30 jylda munaı óndirý úsh ese ósti. Bul jetistik Qazaqstanǵa munaı óndirýdiń ósý qarqyny joǵary elderdiń bestigine kirýge múmkindik berdi. Bolashaqqa kóz júgirtsek, biz jylyna 100 mıllıon tonna shekti eńserýge tyrysamyz», — dedi Prezıdent.

Memleket basshysy gaz ónerkásibiniń damýy qyzyǵýshylyq týdyratyndyǵyn basa aıtty.

«Biz jańa gaz ken oryndaryn izdeýdi bastaý arqyly Chevron kompanııasymen birlesken qyzmetimizdi keńeıttik. Aqtóbe oblysyndaǵy Jalıbek ken ornyn barlaý týraly kelisimge qol qoıyldy. Bul — bizdiń ekijaqty yntymaqtastyǵymyzdaǵy mańyzdy qadam. Munaı-hımııa ónerkásibin damytý Qazaqstan ekonomıkasyn saýyqtyrý úshin de sheshýshi mánge ıe. 2022 jyly biz qýattylyǵy jylyna 500 000 tonna bolatyn Ortalyq Azııadaǵy eń iri polıpropılen zaýytyn iske qostyq. Qazirgi ýaqytta bul kásiporyn ishki suranystyń 60 paıyzyn qanaǵattandyrady jáne óz ónimderin Eýropaǵa, Túrkııa men Qytaıǵa eksporttaıdy. Osy jyldyń qyrkúıeginde biz jylyna 102 mıllıon tonna polıetılen shyǵaratyn zaýyt salýdy bastadyq. Qazirgi ýaqytta 14 mıllıard dollarlyq munaı-hımııa salasyndaǵy birqatar joba qarastyrylyp jatyr», — dedi Qasym-Jomart Toqaev.

Buǵan deıin Qazaqstan tehnıkalyq jáne kásiptik bilim berý sapasyn arttyrýǵa daıyn ınvestorlardy izdeıtindigin jazǵan edik.