Qazaqstan monterleri alǵash ret halyqty toqtan ajyratpaı kerneýli jumys júrgizdi

<p>PAVLODAR. KAZINFORM — Pavlodar elektrjelistik taratý kompanııasynyń elektr monterler brıgadasy Qazaqstanda alǵash ret elektr jelisinde jumystardy kerneýdi ajyratpaı júrgizdi.</p>

Jańa joǵary tehnologııalyq ádis tutynýshylardy elektrmen úzdiksiz jabdyqtaı otyryp, qajetti jumystardy júrgizý múmkindigin beredi.

Pavlodar oblysy Mıchýrıno aýylynda 0,4 kılovolt elektr jelisi tirekterindegi oqshaýlaǵyshtardy aýystyrý jumystary júrgizildi.

Buryn mundaı kólemdi jumystar úshin elektr energııasyn kem degende 4 saǵatqa ajyratý qajet bolar edi.

Qoldanystaǵy jabdyqta jumys isteýdiń zamanaýı ádisin engizý úshin Pavlodar elektrjelistik taratý kompanııasynyń qyzmetkerleri Qazan qalasynda oqytýdan ótti.

Foto: Energetıka mınıstrligi

Pavlodar energetıkteri emtıhan tapsyryp, Tatarstan energetıkterimen birge taǵylymdamadan ótti, kerneýdi ajyratpaı 1000 voltke deıingi elektr jelilerindegi jumysqa ruqsatnama sertıfıkat aldy.

Búgingi tańda kompanııada 0,4 kılovolt kerneýli jumys tehnologııasyn meńgergen elektr monterlerdiń daıyndalǵan eki brıgadasy bar.

Energetıkter elektr berý jelilerindegi kerneýli jumystardy oryndaýdy 10 kılovoltqa deıin keńeıtýdi josparlap otyr, bul kerneýi ajyratylatyn tutynýshylar sanyn edáýir qysqartady.

«10 kılovoltke deıingi áýe jelilerindegi jumystar úshin personaldy oqytý josparlary bekitilip qoıdy. Bul elektr jelilerin paıdalanýdaǵy mańyzdy kezeń, sebebi mundaı jumystardyń qaýipsizdigi men tıimdiligi jumysshy brıgadalardyń biliktiligine tikeleı baılanysty. 10 kılovoltke deıingi kerneýli jumystardy oryndaý úshin qajetti mamandandyrylǵan jabdyqty satyp alý iske asyrylýda, bul — oqshaýlaǵysh býyny bar avtogıdrokótergish jáne arnaıy quraldar. Qazirgi ýaqytta elimizden tys jerlerge shyqpaı-aq personaldy oqytý jáne jattyqtyrý úshin oqý-jattyǵý ortalyǵynyń qurylysy jobasy ázirlenýde, bul mamandardy daıarlaý sapasyn arttyryp, kadrlardy daıarlaýǵa jumsalatyn ýaqyt pen qarjylyq shyǵyndardy qysqartýǵa múmkindik beredi. Jabdyqtar men qyzmetkerlerge salynǵan ınvestıtsııa — kerneýli jumys tehnologııasyn sátti engizýdiń qajetti sharty», — deıdi «Pavlodar ETK» AQ bas dırektory Aleksandr Glotov.

Foto: Energetıka mınıstrligi

Mamandar jumystyń bul túri — josparly jóndeý jumystaryn júrgizýdiń kezekti tásili ǵana emes, Qazaqstan energetıkasy damýynyń jańa kezeńi ekenin atap ótti.

Kerneýli jumystardy júrgizý tehnologııalary únemi jetildirilýde, bul tehnologııalardy qoldaný Pavlodar energetıkterine Qytaı, Reseı, Japonııa, Kanada jáne basqa elderdiń energetıkterimen qatar turý múmkindigin berdi.