Qazaqstan MMA quramasy Azııa chempıonatynan 25 medal jeńip aldy

DÝShANBE. QazAqparat - 27-30 qazan aralyǵynda Tájikstan astanasy Dýshanbe qalasynda MMA boıynsha Azııa chempıonaty ótti. Azııa birinshiligine 18 elden kelgen 200 shaqty sportshy qatysty. El namysyn MMA ultyq quramasynyń 37 sportshysy qorǵaǵan, dep habarlaıdy QazAqparat.

Qazaqstannyń quramasy 7 altyn, 8 kúmis jáne 10 qola júldege ıe boldy.

Jastar arasynda 61,2 keli salmaqta fınaldyq beldesýde Adel Mahametova (Almaty oblysy) ózbek sportshysy Zebınıso Otakýlovany úshinshi raýndta tehnıkalyq nokaýtpen aıaqtap, Qazaqstan qorjynyna alǵashqy altyndy saldy.

Jastar arasynda 56,7 kelige deıingi salmaqta Ersultan Shakenbaı (Astana) fınaldyq beldesýde tóreshilerdiń sheshimimen mońǵolııalyq Otgonbaatar Boltbaatardy jeńip, sporttyq mansabyndaǵy taǵy bir altyndy qanjyǵasyna baılady.

Aıta keteıik, Ersultan 16-17 jas aralyǵyndaǵy jasóspirimder, 18-20 jas aralyǵyndaǵy jastar arasynda álem chempıony, Ortalyq Azııa, Eýropa chempıony, al endi Azııa chempıony ataǵyn da baǵyndyrdy.

83,9 kelige deıingi orta salmaqta (jastar) fınalda eki qazaqstandyq – Denıs Cherepenko (Jambyl oblysy) men Dıas Oser (Almaty) kezdesti.

Úsh raýnd boıy beldesip, Dıas Oser biraýyzdan jeńiske jetip, MMA boıynsha Azııa chempıony atandy. Cherepenko ekinshi oryndy ıelendi.

Jastar arasynda 65,8 keli salmaqta Samǵat Shabdan (BQO) tóreshilerdiń sheshimimen tájikstandyq Ýmronjon Mansýrovtan utylyp, kúmis júldeger atandy.

Eresekter arasynda 10 qazaqstandyq sportshy Azııa chempıonatynyń «altynyna» talasty.

47,6 kelige deıingi salmaqtaǵy alǵashqy beldesýde eki qazaqstandyq qyz – Túımegúl Júnis (Shymkent) pen Qymbat Ahmet (Túrkistan oblysy) kezdesýi tıis edi.

Biraq qyzdar jekpe-jeksiz jeńis tuǵyryn bylaısha bólisti: Ahmet chempıon atandy, Júnis ekinshi oryndy ıelendi.

52,2 keli salmaqta Erulan Qabdýlov (Atyraý oblysy) tájikstandyq Isrofıl Tolıbzodamen kezdesti. Úsh raýndtyń qorytyndysy boıynsha tóreshiler jeńisti qazaqstandyqqa berdi.

Dál osy salmaqta qyzdar arasynda Matılda Bachýrına (Aqmola oblysy) Bahreın atynan shyqqan Aıza Ramospen kezdesti.

Bachýrına qolǵa aýyrtý ádisine túsip, jeńiliske ushyrap, ekinshi oryn aldy.

Qyzdar arasynda 56,7 kelige deıingi salmaqta Áıgerim Tórehanova (Shymkent) Bahreın atynan shyǵatyn brazılııalyq Fabıola Sılvadan tehnıkalyq nokaýtpen utylyp, kúmis júldeger atandy.

Qyzdar arasynda 65,8 kelige deıingi salmaqta Móldir Áshirbekova (Almaty oblysy) Bahreın sportshysy Sabrına de Soýzadan jeńilip qaldy.

70,3 kelige deıingi salmaqta Belgibaı Ádilbek (Túrkistan oblysy) biraýyzdan sheshimmen tájikstandyq Masýd Odınaevqa ese jiberip, ekinshi oryndy ıelendi.

Jartylaı orta salmaqta 77,1 kelige deıingi salmaqta óner kórsetken Dosjan Kenjebaev (Almaty oblysy) tóreshilerdiń sheshimimen Ramazan Gıtınovten utylyp, kúmis júldeger atandy.

93 kelige deıingi salmaqta Alık Domnıch (Astana) Anvar Langarchıevti sózsiz jeńip, Azııa chempıony atandy.

120,2 keliden joǵary salmaq dárejesinde óner kórsetken Rasýl Hataev (Mańǵystaý oblysy) tájikstandyq Shakrýh Fatoevty qylqyndyrý ádisimen jeńip, altyn júlde aldy.

Qazaqstan quramasy komandalyq esepte jastar arasynda ekinshi jáne eresekter arasynda ekinshi oryndy ıelendi.

Foto: kazmma.kz