Qazaqstan metan shyǵaryndylaryn azaıtý boıynsha jumysty kúsheıtýge nıetti

<p>ASTANA.KAZINFORM - Astanada QR Energetıka mınıstri Almasadam Sátqalıev Eýropalyq qaıta qurý jáne damý bankiniń (EQDB) ókilderimen kezdesý ótkizip, onyń barysynda respýblıka metan shyǵaryndylaryn azaıtý jónindegi jumysty jandandyrýǵa baǵyttalǵanyn atap ótti jáne halyqaralyq ınstıtýtty osy protseske qatysýǵa şaqyrdy.</p>

Kezdesý barysynda QR Energetıka mınıstrliginiń basshysy respýblıkanyń metan boıynsha jahandyq mindettemege qosylǵanyn eske saldy, bul onyń energetıkaǵa dáıekti kóshý jáne ekonomıkany kezeń-kezeńimen kómirteksizdandyrý kýrsyna beıildiligin rastaıdy.

«Jalpy, eldiń energetıka salasynda parnıktik gazdardyń tómendeý úrdisin baıqap otyrmyz. Osylaısha, bes jyl ishinde energetıka salasyndaǵy metan shyǵaryndylary SO2-ekv. 1,2 mln. tonnaǵa azaıdy. Osy kezeńde biz bul baǵyttaǵy jumysty jandandyrýǵa daıynbyz», - dedi A.Sátqalıev.

Qazaqstandaǵy halyqaralyq kompanııalar men damý bankteriniń ókildigin, atap aıtqanda, Eýropalyq qaıta qurý jáne damý bankiniń qyzmetin eskere otyryp, mınıstr úzdik nátıjelerge jyldam qol jetkizý úshin antropogendik metan shyǵaryndylaryn azaıtý turǵysynan tehnologııalyq qoldaý, ınvestıtsııalar men granttar tartý máselesin birlesip sheshýdi usyndy.
Kezdesý barysynda A.Sátqalıev EQDB ókilderin mınıstrliktiń sýtegi strategııasy boıynsha tujyrymdama jobasyn ázirleýi týraly habardar etti. Atalǵan qujat sýtegin óndirý, tasymaldaý jáne saqtaýdyń úzdik tehnologııalaryn ázirleý maqsatynda ǵylymı-zertteý jumystaryn júrgizýge arnalǵan.

«Sonymen qatar biz sýtegi energetıkasy salasyndaǵy ozyq tájirıbeni nasıhattaý quraly retinde Qazaqstanda pılottyq jobalardy iske qosý múmkindigin qarastyrýdamyz. Mundaı jobalar jańa ıdeıalar men ınnovatsııalyq tásilderdi tájirıbege engizbes buryn synaqtan ótkizýge múmkindik beredi», - dedi mınıstr.

Esterińizge sala keteıik, búginde Energetıka mınıstrligi EQDB-men birlesip, jańartylatyn energııa kózderi, elektr energetıkasy jáne gaz ónerkásibi salalarynda birlesken aýqymdy jobalardy júzege asyrýda. Onyń ishinde, shamamen 536 mıllıon AQSh dollaryn quraıtyn birqatar kelisimder men memorandýmdarǵa qol qoıyldy.