Qazaqstan men Japonııa arasyndaǵy ınvestıtsııalardy kótermeleý týraly kelisim qabyldandy - Parlament

ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasy men Japonııa arasyndaǵy Investıtsııalardy kótermeleý jáne qorǵaý týraly kelisimdi ratıfıkatsııalaý týraly» QR Zańy qabyldandy. Kelisimge 2014 jyldyń 23-i qazanynda Astanada Qazaqstan men Japonııa Ekonomıkalyq yntymaqtastyq jáne úkimettik-jeke sektorlardyń birlesken komıssııasynyń besinshi otyrysynda qol qoıylǵan bolatyn.

Qujattyń maqsaty ınvestıtsııalyq klımatty jaqsartý jáne elder arasynda ózara tıimdi saýda-ekonomıkalyq yntymaqtastyqty odan ári damytý bolyp tabylady. «Qujatqa qol qoıý úshin taraptar 18 jyl kelissózder júrgizdi. Jalpy 2005 jyldan beri Japonııadan Qazaqstanǵa 4,5 mlrd dollar tikeleı ınvestıtsııa tartylǵan. Al elimizde Qazaqstan-Japon bıznesiniń qatysýymen 50-den astam birlesken kompanııa jumys isteıdi», - dedi Investıtsııalar jáne damý mınıstri Áset Isekeshev. Aıta keterligi, kelisimge sáıkes, ekinshi Tarap ınvestordyń ınvestıtsııalaryn eksproprıatsııalanǵan jáne memleket menshigine aınaldyrǵan kezde oǵan ótemaqy tólenetini kózdeledi. Bul kidirissiz tólenýge jáne tólem merzimine deıingi ýaqyt kezeńi eskerile otyryp, ádil naryqtyq mólsherleme boıynsha paıyzdy qamtıdy. Sonymen qatar kelisimdi júzege asyrý úshin taraptar birlesken komıssııa quratyn bolady. Birlesken komıssııa fýnktsııasyna kelisimdi atqarý jáne júzege asyrý týraly aqparat almasý, sonymen qatar ınvestıtsııamen baılanysty basqa da máselelerdi talqylaý kiredi. Bul óz kezeginde taraptardyń arasynda ınvestorlar úshin jaǵymdy ahýal qurýǵa septigin tıgizbek. Parlament qabyldaǵan zań Memleket basshysynyń qol qoıýyna joldanady.