Qazaqstan men Vatıkan yntymaqtastyqty tereńdetý týraly kelisimge qol qoıdy

NUR-SULTAN. QazAqparat – Qazaqstan jáne Vatıkan ekijaqty yntymaqtastyqty tereńdete túsý maqsatynda qosymsha kelisimge keldi, dep habarlaıdy QazAqparat tilshisi.

Atalǵan kelisimge Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi jáne Vatıkannyń memlekettermen qatynastar jónindegi hatshysy arhıepıskop Pol Rıchard Gallaher qol qoıdy.

Maqsat – Qazaqstan Respýblıkasy men Vatıkan arasyndaǵy yntymaqtastyqqa qurylǵan qarym-qatynasty nyǵaıta túsý.

Eske sala ketsek, eki el arasyndaǵy yntymaqtastyqqa baǵyttalǵan kelisim 1998 jylǵy 24 qyrkúıekte jasaldy.

«Búgin Syrtqy ister mınıstrliginiń qabyrǵasynda Qazaqstan men Vatıkan arasynda qosymsha kelisim jasalyp otyr. Kelisim eki memleket arasyndaǵy yntymaqtastyqty nyǵaıta túsýdi kózdeıdi. Sebebi Vatıkan óz aldyna memleket. Sondaı-aq búgingi kelisim osydan 24 jyl buryn jasalǵan kelisimdi tolyqtyryp, tereńdete túspek. Qosymsha kelisimniń merzimi joq. Tek Parlamenttiń ratıfıkatsııasyn talap etedi», - dedi búgin QR Syrtqy ister mınıstriniń orynbasary Roman Vasılenko tilshilerdiń suraǵyna jaýap bere turyp.

Aıta keteıik, qosymsha kelisim Rım Papasy Frantsısktiń Qazaqstan Respýblıkasyna memlekettik sapary aıasynda jasalyp otyr.