Qazaqstan men Vetnam ózara saýdany jańa deńgeıge shyǵarmaq

ASTANA. QazAqparat -   QR Syrtqy ister mınıstriniń orynbasary Aqylbek Kamaldınov Qazaqstan jáne Vetnamnyń syrtqy saıası vedomstvolarynyń arasyndaǵy saıası konsýltatsııalardyń 7-shi raýndyna qatysty, dep habarlaıdy QazAqparat.

QR SІM baspasóz qyzmetiniń málimetinshe, konsýltatsııalar barysynda saıası jáne saýda-ekonomıkalyq salalarda qazaqstandyq-vetnamdyq qatynastardyń qazirgi jaǵdaıy jáne bolashaǵy talqylandy.

«Osy jyly biz Qazaqstan jáne Vetnam arasynda dıplomatııalyq qatynastardyń 25 jyldyǵyn atap ótýdemiz. Búgin elimizdiń arasyndaǵy qarym-qatynastar barlyq salalarda derlik sátti ári turaqty damyp keledi. Bul rette bizdiń qatynastarymyzdyń bolashaǵy zor jáne olardy odan ári qarqyndatýǵa jaqsy múmkindikter bar», - dep atap ótti A. Kamaldınov.

Dıplomattyń aıtýynsha, Qazaqstan jáne Vetnamdy syrtqy saıasatta da ortaq basymdyqtar biriktiredi. Memleketterimiz arasynda qandaı da bir kelispeýshilik joq. BUU, AÓSShK, Azııa-Eýropa forýmyn qosa alǵanda elderimiz kópjaqty yntymaqtastyq aıasynda yqpaldasyp, bir-biriniń bastamalaryn ózara qoldap otyrady.

A.Kamaldınov saýda-ekonomıkalyq ózara árekettesýdiń bar áleýetine nazar aýdara otyryp, 2015 jyly mamyrda Eýrazııalyq ekonomıkalyq odaqqa (EAEO) múshe memleketter men Vetnam arasyndaǵy erkin saýda týraly kelisimine qol qoıylǵannan beri, elderimizdiń aldynda ózara saýdany keńeıtý úshin jańa múmkindikter ashylyp otyrǵanyn atap ótti.

Vetnam delegatsııasynyń basshysy, Syrtqy ister mınıstriniń orynbasary Dang Dın Kýı Vetnam úshin Qazaqstan TMD jáne Ortalyq Azııa óńirindegi eń mańyzdy áriptesterdiń biri bolyp tabylatynyn jetkizdi.

Vetnamdyq dıplomat ekijaqty yntymaqtastyqtyń qazirgi jaǵdaıy men bolashaǵyn joǵary baǵalap, qazaqstandyq-vetnamdyq qatynastardy odan ári keńeıtý boıynsha naqty is-qımyl josparyn ázirleý qajettigin erekshe atap ótti.

Taraptar eki eldiń syrtqy saıası vedomstvolarynyń arasynda saıası konsýltatsııalardy jalǵastyrýǵa yqylas bildirdi.

Sol kúni A. Kamaldınov Vetnam Premer-Mınıstriniń orynbasary - Syrtqy ister mınıstri Fam Bın Mınmen kezdesti. Kezdesý barysynda eki el arasyndaǵy 25 jyldyq yntymaqtastyqqa baǵa berildi.

Fam Bın Mınniń sózine qaraǵanda, EAEO-ǵa múshe memleketter men Vetnam arasyndaǵy erkin saýda týraly kelisimdi iske asyrýdyń jyldyq qorytyndysy boıynsha Qazaqstanmen saýda aınalymynyń turaqty ósýi baıqalýda.

Sonymen qatar halyqaralyq jáne óńirlik kún tártiptiń negizgi máseleleri boıynsha pikir almasý oryn aldy. A. Kamaldınov 2018 jylǵy qańtarda BUU Qaýipsizdik Keńesinde Qazaqstannyń tóraǵalyǵy barysynda qazaqstandyq tarap josparlaǵan is-sharalar týraly habardar etti.