Qazaqstan men Vetnam arasynda vızasyz rejım ornaıdy

ASTANA. QazAqparat – Qazaqstan Respýblıkasy Syrtqy ister mınıstrliginiń konsýldyq qyzmet departamenti dırektorynyń orynbasary Ǵabıden Temirbekov Vetnam Sotsıalıstik Respýblıkasynyń Syrtqy ister mınıstrligi konsýldyq departamentiniń dırektory Lıýong Tan Kýanmen beınekonferentsııa formatynda kelissóz ótkizdi, dep habarlaıdy QazAqparat.

Taraptar konsýldyq salada dostyq qarym-qatynastardy odan ári nyǵaıtý múmkindigin atap, alǵashqy ári mańyzdy qadamdardyń biri retinde eki eldiń jalpyazamattyq pasport ıeleri úshin vızalyq rejımdi jeńildetý jóninde úkimetaralyq kelisimge qol qoıýǵa ýaǵdalasty.

Ǵ. Temirbekov Vetnam tarapyna Qazaqstan Syrtqy ister mınıstrliginiń Ońtústik-Shyǵys Azııa óńirimen túrli salalardaǵy baılanysty odan ári tereńdetý nıeti týraly aıtty jáne úkimetaralyq qujattarǵa qol qoıý - ony tikeleı rastaý ekenin jetkizdi.

Lıýong Tan Kýan eki el arasyndaǵy qarym-qatynasta tańdalǵan baǵyttyń mańyzyna nazar aýdardy jáne halyqaralyq shartty tez arada kelistirýge bar kúshin salýǵa daıyn ekenin aıtty.