Qazaqstan men Vetnam arasynda áýe reısi qaıta ashylady

NUR-SULTAN. QazAqparat – QR IIDM Azamattyq avıatsııa komıteti Vetnam Sotsıalıstik Respýblıkasynyń avıatsııalyq bılik oryndarymen birlesip, Qazaqstan men Vetnam arasyndaǵy turaqty jolaýshylar reısterin qaıta qalpyna keltirý jumysyn júrgizip jatyr, dep habarlaıdy QazAqparat tilshisi.

Atalǵan komıtettiń Facebook paraqshasynda jarııalanǵan aqparatqa sáıkes, vetnamdyq «Vietjet Air» iri áýe kompanııasy aldaǵy qyrkúıek aıynyń sońynan bastap Airbus A-330 úlgisinde áýe kemesimen aptasyna 2-3 ret jıilikpen Kamran – Nur-Sultan jáne Kamran – Almaty baǵytynda turaqty jolaýshylar reısterin oryndaýdy josparlap otyr.

Qazaqstan men Vetnam arasyndaǵy áýe qatynasyn qalpyna keltirý elder arasyndaǵy saýda-ekonomıkalyq, ınvestıtsııalyq, týrıstik jáne mádenı yntymaqtastyqty damytýdy jedeldetýge múmkindik beredi.

«Vietjet Air» - Vetnamnyń tómen bıýdjetti áýe tasymaldaýshysy. Áýe kompanııa reısterdi 2007 jyly bastady. 19-dan astam baǵyt boıynsha álemniń 10 eline (Sıngapýr, Malaızııa, Mıanma, Indonezııa, Kambodja, Taıvan, Ońtústik Koreıa, Qytaı, Japonııa jáne Úndistan) halyqaralyq reısterdi oryndaıdy. Kompanııa parkinde Airbus A320, A321, A321 neo, A330 úlgisindegi 78 áýe kemesi bar.