Qazaqstan men Úndistan áskerı saladaǵy yntymaqtastyqty talqylady

TAShKENT. QazAqparat - Tashkentte Shanhaı yntymaqtastyq uıymyna múshe elder qorǵanys mınıstrleriniń kezekti keńesi aıasynda Qazaqstannyń qorǵanys mınıstri general-polkovnık Rýslan Jaqsylyqov pen Úndistan qorǵanys vedomstvosynyń basshysy Radjnath Sıngh ekijaqty kezdesý ótkizdi, dep habarlaıdy QazAqparat.

QR Qorǵanys mınıstrliginen málim etkendeı, taraptar áskerı-tehnıkalyq yntymaqtastyq, bitimgerlik qyzmet, kadr daıarlaý jáne áskerı bilim berý máselelerin talqylady.

«Qorǵanys vedomstvolarynyń basshylary eki jaqty negizde de, halyqaralyq formattar sheńberinde de eki el arasyndaǵy ózara qarym-qatynas deńgeıin joǵary baǵalap, qorǵanys salasyndaǵy yntymaqtastyqty nyǵaıtýǵa múddeli ekenin bildirdi», - delingen habarlamada.

Aıta keteıik, 24 tamyzda Tashkentte Shanhaı yntymaqtastyq uıymyna múshe elder qorǵanys mınıstrleriniń kezekti keńesi bastaldy.

Ýuz.uz portalynyń málimetinshe, keńeske uıymǵa múshe elderdiń jáne baqylaýshy memleketter qorǵanys vedomstvolarynyń basshylary, sondaı-aq ShYU Hatshylyǵynyń ókilderi qatysyp jatyr.

Keńes kún tártibine sáıkes, delegatsııalar áskerı saladaǵy birqatar máseleni talqylaıtyn bolady.

ShYU qorǵanys mınıstrleriniń buǵan deıingi kezdesýi 2021 jyly 28 maýsymda Tájikstanda ótti.

Foto: gov.kz