Qazaqstan men Úndistan arasynda turaqty reıster qaıta usha bastaıdy
10:16, 02 Qarasha 2021
NUR-SULTAN. QazAqparat – Qazaqstan men Úndistan arasyndaǵy turaqty áýe qatynasy qalpyna keltirildi. QazAqparat bul týraly QR Indýstrııa jáne ınfraqurylymdyq damý mınıstrligine silteme jasap habarlaıdy.
Qazaqstan Respýblıkasynyń aýmaǵynda koronavırýstyq ınfektsııanyń paıda bolýy men taralýyna jol bermeý jónindegi vedomstvoaralyq komıssııanyń sheshimderine sáıkes Qazaqstan men Úndistan arasyndaǵy turaqty áýe qatynasyn qalpyna keltirýge ruqsat etildi.
2021 jylǵy 15 qarashadan bastap «Eır Astana» áýe kompanııasy Almaty – Delı – Almaty baǵytynda aptasyna 3 reıs oryndaýdy josparlap otyr.
«Reıster sanıtarlyq-epıdemıologııalyq talaptardy qatań saqtaı otyryp jáne áýe kompanııasynyń saıtynda jarııalanǵan kestege sáıkes oryndalady», - delingen mınıstrlik málimetinde.
Eske salaıyq, 4 qarashadan bastap Reseıdiń Kalınıngrad qalasyna reıster usha bastaıdy. 7 qarashadan Ázerbaıjanǵa turaqty reıster oryndalady.