Qazaqstan men Ulybrıtanııa yntymaqtastyqtyń jańa salalaryn belgiledi

ASTANA. QazAqparat - Bul týraly búgin Astanada saýdada-ekonomıkalyq, ǵylymı-tehnıkalyq jáne mádenı yntymaqtastyq jónindegi Qazaqstan-Brıtan úkimetaralyq komıssııasynyń besinshi otyrysy ótti, dep habarlaıdy QazAqparat.

«Qazaqstan úshin Ulybrıtanııa Eýropadaǵy negizgi ári strategııalyq seriktesterdiń biri bolyp otyr. Shırek ǵasyr ýaqytta ekijaqty qarym-qatynastardyń joǵary qarqynyn atap ótkim keledi. Jyl saıyn osy formattaǵy kezdesýler bizdiń ózara baılanystarymyzdy nyǵaıta túsýde, sondaı-aq saýda-ekonomıkalyq qatynastardy ilgerletýdiń jańa tetikteri kózdelýde», - dep toqtaldy QR Investıtsııalar jáne damý mınıstri Jeńis Qasymbek.

Onyń sózine qaraǵanda, Qazaqstan-Brıtan úkimetaralyq komıssııasy aıasynda 4 jumys toby bar. Bul baǵytta aıtarlyqtaı qyzý pikirtalastar ótýde.

«Ulybrıtanııa saýda aınalymy boıynsha Qazaqstannyń 10 úzdik saýda seriktesteriniń tobyna kiredi. 2017 jyldyń qortyndysyna súıensek, eki memleket arasyndaǵy taýar aınalymy 2 paıyzǵa ósip, 1,3 mlrd AQSh dollaryn qurady. Árıne, bul turǵyda bizdiń áleýet aıtarlyqtaı joǵary. Osy oraıda úkimetaralyq komıssııa múmkindigimen saýda qatynastaryna qosymsha qarqyn berýge múddelimiz», - dedi Jeńis Qasymbek.

 

Vedomstvo basshysynyń aıtýynsha, búginde Qazaqstanda brıtandyq kapıtaldyń qatysýymen 400-den astam birlesken kásiporyn jumys isteýde. Otyrys barysynda munaı-gaz, qarjy, taý-ken salalarynan bólek, jańartylǵan energııa kózderi, sýmen jabdyqtaý, aýyl sharýashylyǵy, sondaı-aq qaldyqtardy kádege jaratý baǵytyndaǵy áleýetti jobalar talqylandy.

Taratylǵan málimetterge qaraǵanda, Qazaqstan men Ulybrıtanııa arasyndaǵy syrtqy saýda aınalymy 2018 jyldyń qańtar-shildesinde 743,4 mln AQSh dollaryn qurady.